مۇحتار اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىندە مەملەكەت باسشىسى قاسىم-جومارت توقاەۆتىڭ 2026 جىلعى 28 قازانداعى «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى قازاقستان حالقىنا جولداۋىندا بەلگىلەنگەن باسىمدىقتاردى ناسيحاتتاۋعا ارنالعان جيىن ءوتتى.
ءىس-شارانى ۋنيۆەرسيتەت رەكتورىنىڭ مىندەتىن ۋاقىتشا اتقارۋشى رىسگۇل قۇدرەتۋللاەۆا اشىپ، پرەزيدەنت جولداۋىندا كوتەرىلگەن مىندەتتەردى جۇزەگە اسىرۋدا جوعارى وقۋ ورىندارىنا ۇلكەن جاۋاپكەرشىلىك جۇكتەلەتىنىن اتاپ ءوتتى. ونىڭ ايتۋىنشا، ەل دامۋىنىڭ باسىم باعىتتارىنا ساي ماماندار دايارلاۋ، عىلىمدى دامىتۋ جانە زاماناۋي تەحنولوگيالاردى ءبىلىم بەرۋ ۇدەرىسىنە ەنگىزۋ – ۋنيۆەرسيتەتتىڭ نەگىزگى مىندەتتەرىنىڭ ءبىرى.
جيىندا قۇرىلىس، سۋ رەسۋرستارى، اتوم ەنەرگەتيكاسى جانە ازاماتتىق جاۋاپكەرشىلىك باعىتتارى بويىنشا باياندامالار جاسالىپ، پرەزيدەنت جولداۋىنداعى مىندەتتەردى جۇزەگە اسىرۋداعى ۋنيۆەرسيتەتتىڭ ءرولى كەڭىنەن ناسيحاتتالدى.
العاشقى بولىپ «قۇرىلىس جانە ينفراقۇرىلىمدى دامىتۋ ماسەلەلەرى» تاقىرىبىندا بايانداما جاساعان اسقار مامىرباەۆ مەملەكەت باسشىسى ۇسىنعان «حالىقتىق قۇرىلىس» باستاماسىنىڭ ماڭىزىن ءتۇسىندىردى. الەۋمەتتىك ينفراقۇرىلىمدى دامىتۋ ءۇشىن بىلىكتى ساۋلەتشىلەر مەن قالا قۇرىلىسى ماماندارى قاجەت ەكەنىن اتاپ ءوتتى. وسى ورايدا «ساۋلەت جانە قالا قۇرىلىسى» كافەدراسىنىڭ باستى مىندەتى – سالا سۇرانىسىنا ساي كاسىبي ماماندار دايارلاۋ ەكەنى ايتىلدى.
تەحنيكا عىلىمدارىنىڭ كانديداتى، دوتسەنت پاريدا سۇلتانبەكوۆا «سۋ رەسۋرستارى – ۇلتتىق قاۋىپسىزدىك پەن تۇراقتى دامۋدىڭ نەگىزى: پرەزيدەنت جولداۋى اياسىنداعى مىندەتتەر» تاقىرىبىندا بايانداما وقىدى. ول سۋ رەسۋرستارىن ۇنەمدەۋ مەن ءتيىمدى باسقارۋدىڭ ستراتەگيالىق ماڭىزىن ءتۇسىندىرىپ، ۋنيۆەرسيتەتتە سەنسورلىق جانە تسيفرلىق تەحنولوگيالاردى قولدانۋ، سۋ شىعىنىن باقىلاۋ جانە ءبىلىم بەرۋ ۇدەرىسىن جاڭعىرتۋ باعىتىندا اتقارىلىپ جاتقان جۇمىستاردى تانىستىردى. سونداي-اق سۋ شارۋاشىلىعى سالاسىنا زاماناۋي تەحنولوگيالاردى مەڭگەرگەن ماماندار دايارلاۋدىڭ قاجەتتىگىن اتاپ ءوتتى.
«فيزيكا» كافەدراسىنىڭ دوتسەنتى، PhD, قاۋىمداستىرىلعان پروفەسسور ساپارعالي پازىلبەك «قازاقستاننىڭ اتوم ەنەرگەتيكاسى جانە يادرولىق فيزيكا ماماندارىن دايارلاۋ» تاقىرىبىندا بايانداما جاسادى. ول اتوم ەنەرگەتيكاسىن دامىتۋدىڭ ماڭىزى مەن وسى سالاداعى عىلىمي-تەحنيكالىق كادرلارعا سۇرانىس تۋرالى ايتىپ، ۋنيۆەرسيتەتتە الداعى ۋاقىتتا «يادرولىق فيزيكا» ءبىلىم بەرۋ باعدارلاماسىن اشۋ جوسپارلانىپ وتىرعانىن جەتكىزدى. بۇل باستاما ەلىمىزدىڭ ەنەرگەتيكالىق قاۋىپسىزدىگىن نىعايتۋعا قاجەتتى ماماندار دايارلاۋعا باعىتتالعان.
ۋنيۆەرسيتەتتىڭ ءباسپاسوز حاتشىسى ءازىمحان يسابەك «وركەنيەتتى مەملەكەت جانە “ادال ازامات” تۇجىرىمداماسى» تاقىرىبىندا بايانداما جاساپ، ادالدىق، جاۋاپكەرشىلىك، زاڭعا قۇرمەت جانە ازاماتتىق ۇستانىم قۇندىلىقتارىن ناسيحاتتادى. سونداي-اق جوعارى وقۋ ورنىنىڭ مىندەتى تەك كاسىبي مامان دايارلاۋ ەمەس، ەل دامۋىنا جاۋاپكەرشىلىكپەن قارايتىن سانالى ازامات تاربيەلەۋ ەكەنىن اتاپ ءوتتى.
ال «ەنەرگەتيكا جانە ءداستۇرلى ەمەس ەنەرگەتيكالىق جۇيەلەر» كافەدراسىنىڭ PhD, دوتسەنتى نۇرسۇلتان فايز «اتوم ەلەكتر ستانتسياسىندا يادرولىق رەاكتوردىڭ ءپروتوتيپى رەتىندە تسيفرلىق ەگىزدى ەندىرۋ» تاقىرىبىندا بايانداما جاسادى. ول الەمدىك دامۋدىڭ جاڭا كەزەڭىندەگى «ەلەكتر ءداۋىرى» ۇعىمىن ءتۇسىندىرىپ، ەلەكتر ەنەرگياسىنا سۇرانىستىڭ ارتۋى، قازاقستاندا اتوم ەنەرگەتيكاسىن دامىتۋدىڭ ماڭىزى مەن الداعى جوسپارلار تۋرالى اقپارات بەردى. جاستارعا ەنەرگەتيكا سالاسىنداعى جاڭا تەحنولوگيالار مەن ينجەنەرلىك ماماندىقتاردىڭ بولاشاعىن ناسيحاتتادى.
جيىن بارىسىندا پرەزيدەنت جولداۋىندا بەلگىلەنگەن ستراتەگيالىق باسىمدىقتاردى جۇزەگە اسىرۋدا عىلىم مەن ءبىلىمنىڭ، كاسىبي كادر دايارلاۋدىڭ جانە يننوۆاتسيالىق تەحنولوگيالاردىڭ ماڭىزى كەڭىنەن ءتۇسىندىرىلدى. اۋەزوۆ ۋنيۆەرسيتەتى جاڭا ءبىلىم بەرۋ باعدارلامالارىن دامىتۋ، سۇرانىسقا يە ماماندار دايارلاۋ جانە عىلىمي زەرتتەۋلەردى جەتىلدىرۋ ارقىلى ەل دامۋىنىڭ باسىم باعىتتارىنا ۇلەس قوسۋدى كوزدەيدى.
