تۇركىستان وبلىسىندا حالىقارالىق تالاپتارعا ساي اتشابار مەن ەسكەك ەسۋ كانالىنىڭ قۇرىلىسى جالعاسۋدا. وبلىس اكىمى نۇرالحان كوشەروۆ اتالعان نىسانداردى ارالاپ، قۇرىلىس بارىسىمەن تانىستى.
كوپفۋنكتسيونالدى كەشەن رەتىندە سالىنىپ جاتقان اتشابار حالىقارالىق ات سپورتى فەدەراتسياسىنىڭ تالابىنا ساي بوي كوتەرۋدە. مۇندا بولاشاقتا حالىقارالىق جارىستاردى وتكىزۋ كوزدەلگەن. اتاپ ايتقاندا، وليمپيادا ويىندارى باعدارلاماسىنا ەنگىزىلگەن كونكۋر، ءۇشسايىس جانە ۇلتتىق سپورت تۇرلەرى بويىنشا جارىستار وتكىزۋگە مۇمكىندىك تۋماق.
بۇل نىساندا 30-دان اسا تەحنيكا مەن 71 ادام جۇمىس ىستەۋدە. وبلىس اكىمى نىساننىڭ قۇرىلىس جوسپارىمەن تانىسىپ، قولدانىلاتىن ماتەريالدارى تۋرالى ماماندار پىكىرىن تىڭداپ، جاۋاپتى باسشىلار مەن مەردىگەرگە ناقتى مىندەتتەر جۇكتەدى.
ودان كەيىن نۇرالحان كوشەروۆ حالىقارالىق دەڭگەيدەگى ەسكەك ەسۋ كانالىنىڭ قۇرىلىس بارىسىن قالاعالادى. عيماراتتارىن ارالاپ، ساپالى ماتەريال قولدانۋ ءارى ساۋلەتىن كەلىستى ەتۋ جونىندە تاپسىرما بەردى.
بۇل كەشەن ەلىمىزدە ەسكەك ەسۋ، اكادەميالىق ەسۋ سپورت تۇرلەرىن، سونىمەن بىرگە ءتۋريزمدى دامىتۋعا مۇمكىندىك بەرەدى. تۇركىستان قالاسىنىڭ سۋارۋ جۇيەسىنە وڭ ىقپالىن تيگىزەدى. نىساننىڭ قۇرىلىسى 2021 جىلى باستالدى. ءۇش كەزەڭنەن تۇرادى. بۇگىنگى تاڭدا ءۇشىنشى كەزەڭنىڭ قۇرىلىس جۇمىستارى قارقىندى جۇرگىزىلۋدە. قۇرىلىس الاڭىندا 165 ادام جانە 24 تەحنيكا جۇمىلدىرىلعان.
كەشەندە 1000 ورىندىق تريبۋنا، قايىقتار مەن سپورتتىق جابدىقتاردى ساقتاۋعا ارنالعان ەللينگ عيماراتى، تورەشىلەر مۇنارالارى، اەراتسيا جانە ءسۇزۋ جۇيەلەرى، ينجەنەرلىك ينفراقۇرىلىم، سونداي-اق كورەرمەندەرگە ارنالعان تابلو، كوگالداندىرۋ جانە اباتتاندىرۋ ەلەمەنتتەرى قاراستىرىلعان.
ۇقساس جاڭالىقتار
