RAMS Qazaqstan كومپانياسىنىڭ قۇرىلىس ساپاسى سىن كوتەرمەي تۇر، دەپ حابارلايدى "ادىرنا" ءتىلشىسى.
بۇل تۋرالى جاس ساياساتتانۋشى سانجار بوقاەۆ Facebook پاراقشاسىندا ۆيدەو جاريالادى. كادر بارىسىندا تۇرعىن ءۇيدىڭ ساپاسىز قۇرىلىس ماتەريالدارىنان جاسالعانىن انىق كورۋگە بولادى.
قابىرعالاردىڭ ءىشى بەتونمەن ەمەس، پەنوپلاستپەن تولتىرىلعان. ءىشى بوس، ءتىپتى قابىرعانىڭ ىشىندە بەلگىسىز جاندىكتىڭ جۇرگەنى دە انىق كورىنەدى. توزىعى جەتكەن قابىرعالار، تولىق بىتپەگەن قۇرىلىس ارماتۋرالارى.
"بيزنەس پليۋس" ساناتىنداعى تۇرعىن ۇيدە دوموفون جۇمىس ىستەمەيدى، ءورت ءسوندىرۋ قۇرىلعىلارى قوسىلماعان. پودەزدەگى بيىكتىك شامامەن 2,5 مەتردى قۇرايدى. كۇزدىڭ قارا سۋىعى كەلسە دە پاتەردەگى گرادۋس مولشەرى تومەن. سالدارىنان 15 قازان كۇنى بەرىلۋى ءتيىس جىلۋ تۇرعىندارعا ءالى بەرىلمەگەن.
"مەن سىزدەرگە ۇيدەگى جابىق تەرەزەدەن جەلدىڭ قالاي ۋىلدەيتىنىن كورسەتە الامىن. سىزدەر ماعان سەنبەيسىزدەر",-دەيدى تۇرعىن.
RAMS Qazaqstan قۇرىلىس كومپانياسى سالعان كوپقاباتتى ۇيدە كولىك تۇراعى دا جەكە ساۋدالانعان-مىس. قۇنى 5 ميلليون تەڭگە تۇرادى ەكەن.
سانجار بوقاەۆتىڭ سوزىنشە قۇرىلىس بارىسىندا كەتكەن مۇنداي قاتەلىكتەرمەن ادامدار تۇرا المايدى.
"مۇنداي بيىك كوپقاباتتى ءۇيدى قۇىرىلىس-مونتاج شارالارىن ساقتاماي سوعۋ اقىلعا قونىمسىز. ول ءۇشىن ەشكىم دە جاۋاپ بەرمەيدى. ونى ەشكىم تەكسەرمەيدى. RAMS Qazaqstan, بۇل ۇلكەن قاتەلىك! بۇل سىزدەرگە ۇندەۋ! بىرەۋى تاپسىرىس بەرۋشى، ەكىنشىسى قۇرىلىسقا جاۋاپتى، ءۇشىنشىسى ورىنداۋشى، ءتورتىنشىسى ساتۋشى. بۇل جاۋاپكەرشىلىكتى ىسىرىپ قويۋ ءۇشىن ادەيى ويلاستىرىلعان",-دەيدى ساياساتتانۋشى.
