تۇركىستان قالاسىندا مەملەكەت باسشىسى قاسىم-جومارت توقاەۆتىڭ «تازا قازاقستان» باعدارلاماسى اياسىندا قورشاعان ورتانى قورعاۋ مەن ەكولوگيالىق مادەنيەتتى قالىپتاستىرۋعا باعىتتالعان اۋقىمدى ءىس-شارا ءوتتى.
يگى باستاماعا تۇركىستان وبلىسىنىڭ اكىمى نۇرالحان كوشەروۆ، وبلىستىق باسقارمالار مەن دەپارتامەنتتەر باسشىلىعى مەن ۇجىمى، مەملەكەتتىك قىزمەتشىلەر، قالا تۇرعىندارى، تازالىققا جاۋاپتى مەكەمە جۇمىسشىلارى جانە تۇركىستان قالاسى اكىمدىگى مەن قوعامدىق ۇيىم وكىلدەرى قاتىستى.
ءوڭىر باسشىسى نۇرالحان كوشەروۆ تابيعات جاناشىرلارىمەن كەزدەسىپ، بىرگە كوشەت ەكتى.
– «تازا قازاقستان» – ءبىر جىلدىق باعدارلاما ەمەس. ول ءومىر سالتىمىزعا اينالۋعا ءتيىس. تەك اكتسيالاردا عانا ەمەس، كۇندەلىكتى ومىردە اعاش ەگىپ، تازالىقتى ساقتاي بىلسەك، ونى ناسيحاتتاپ، جاستاردى دا يگى ىسكە جۇمىلدىرساق، باستاما ءوز جەمىسىن بەرەدى. بارشا وبلىس تۇرعىندارىن ايماقتى كوگالداندىرۋعا ۇلەس قوسۋعا شاقىرامىز، – دەگەن نۇرالحان كوشەروۆ ەل اعالارىمەن، جاستارمەن پىكىر الماستى.
ءىس-شارا اياسىندا قالانى كوگالداندىرۋ جانە ەكولوگيالىق احۋالدى جاقسارتۋ ماقساتىندا جاپپاي اعاش ەگۋ جۇمىستارى جۇرگىزىلدى. ناتيجەسىندە ءبىر كۇندە 1200 ءتۇپ قىرىم قاراعايى مەن 1000 ءتۇپ جاپىراقتى اعاش ەگىلدى. وسىلايشا، جالپى سانى 2200 اعاش كوشەتى ەگىلىپ، تۇركىستانعا كىرەبەرىستەگى جاسىل بەلدەۋ ايتارلىقتاي تولىقتى. بولاشاقتا بۇل اۋماق سايالى باققا اينالماق.
بۇل باستاما تۇركىستان قالاسىنىڭ ەكولوگيالىق جاعدايىن جاقسارتۋعا، جاسىل جەلەكتەر كولەمىن ارتتىرۋعا جانە تۇرعىنداردىڭ تابيعاتقا دەگەن جاۋاپكەرشىلىگىن كۇشەيتۋگە باعىتتالعان. تاڭعى 7:30-دان باستاپ اعاش ەككەن كوپشىلىك قاۋىم كوتەرىڭكى كوڭىل-كۇيمەن تارقاستى. كوگالداندىرۋ جۇمىستارى الداعى ۋاقىتتا دا جالعاسىن تابادى.
ايتا كەتەيىك، تۇركىستان وبلىسىندا 2021-2025 جىلدار ارالىعىندا 800-دەن استام ەلدى مەكەندە 3,6 ميليوننان استام اعاش كوشەتىن ەگۋ كوزدەلگەن. ال بيىل «تازا قازاقستان» باعدارلاماسى ارقىلى 1 ميلليون ءتۇپ اعاش ەگۋ جوسپارى بەكىتىلىپ، ناقتى جۇمىستار جالعاسىپ جاتىر.
