ارىس قالاسىندا حالىقارالىق دەڭگەيدەگى جەتەكشى سەرىكتەس – فرانتسۋزدىق Alstom كومپانياسىنىڭ ەلەكتروۆوزدارعا ارنالعان جاڭا سەرۆيستىك دەپوسىنىڭ قۇرىلىسى جۇرگىزىلۋدە. جوبا قالانىڭ ماڭىزدى تەمىرجول تورابى رەتىندەگى ستراتەگيالىق الەۋەتىن ارتتىرىپ، وڭىردەگى كولىك-لوگيستيكا سالاسىنىڭ دامۋىنا سەرپىن بەرەدى.
وسىعان وراي، مۇددەلى تاراپتار مەن بۇقارالىق اقپارات قۇرالدارىنىڭ وكىلدەرىنە ارنالعان تانىستىرۋ ساپارى ۇيىمداستىرىلىپ، ارىس قالاسىنداعى جاڭا دەپو قۇرىلىسىنىڭ بارىسى تانىستىرىلدى.
ءىس-شاراعا تۇركىستان وبلىسى اكىمىنىڭ ورىنباسارى ەرتاي التاەۆ، فرانتسيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى جوعارى مارتەبەلى سيلۆان گيوگە، Alstom كومپانياسىنىڭ باتىس جانە ورتالىق ازيا بويىنشا باسقارۋشى ديرەكتورى جەروم بويە، سونداي-اق ارىس قالاسىنىڭ اكىمى قايسار ماڭقاراەۆ، «قازاقستان تەمىر جولى» ۇلتتىق كومپانياسى مەن سالالىق مەكەمەلەردىڭ وكىلدەرى قاتىستى.
ءىس-شارا بارىسىندا تۇركىستان وبلىسىنىڭ اكىمى ورىنباسارى ەرتاي التاەۆ جوبانىڭ ءوڭىر ءۇشىن ەرەكشە ماڭىزعا يە ەكەنىن اتاپ ءوتتى.
– بۇل جوبا – ارىس قالاسىنىڭ وندىرىستىك الەۋەتىن ارتتىرىپ قانا قويماي، ءوڭىرىمىزدىڭ جاڭا دامۋ كەزەڭىنە جول اشاتىن ماڭىزدى باستاما. حالىقارالىق سەرىكتەستەرمەن بىرلەسكەن مۇنداي جوبالار – قالا ەكونوميكاسىن ءارتاراپتاندىرۋدىڭ ناقتى كورىنىسى. ەڭ باستىسى، بۇل باستاما جەرگىلىكتى تۇرعىندار ءۇشىن جاڭا جۇمىس ورىندارىن اشۋعا مۇمكىندىك بەرەدى جانە جاس مامانداردىڭ كاسىبي دامۋىنا جول اشادى، – دەدى ەرتاي كەنجەبەكۇلى.
ءىس-شارا بارىسىندا فرانتسيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى جوعارى مارتەبەلى سيلۆان گيوگە مىرزا ءسوز سويلەپ، قازاقستان مەن فرانتسيا اراسىنداعى ەكونوميكالىق ارىپتەستىكتىڭ ماڭىزدىلىعىنا توقتالدى:
– قازاقستان مەن فرانتسيا اراسىنداعى ىنتىماقتاستىق جىل سايىن جاڭا دەڭگەيگە كوتەرىلىپ كەلەدى. سونىڭ ايقىن دالەلى – Alstom كومپانياسىنىڭ قازاقستاندا جۇزەگە اسىرىپ جاتقان جوبالارى. ارىس قالاسىنداعى بۇل سەرۆيستىك دەپو ەكى ەل اراسىنداعى سەنىم مەن ۇزاق مەرزىمدى سەرىكتەستىكتىڭ ناقتى كورىنىسى بولىپ تابىلادى. مۇنداي جوبالار تەك ەكونوميكاعا عانا ەمەس، وڭىرلىك دامۋعا دا ۇلكەن سەرپىن بەرەدى، – دەدى مارتەبەلى ەلشى.
سونداي-اق ءىس-شارا بارىسىندا جوبانىڭ ءساتتى جۇزەگە اسۋ بارىسىن ايقىندايتىن ەسكەرتكىش تاقتا رەسمي اشىلۋى ءوتتى.
جاڭا نىسان Alstom كومپانياسى مەن قازاقستان رەسپۋبليكاسى ۇكىمەتى اراسىنداعى ينۆەستيتسيالىق كەلىسىم اياسىندا جۇزەگە اسىرىلۋدا. ارىس قالاسىنداعى دەپو – ەلىمىز بويىنشا سالىناتىن ءتورت سەرۆيستىك ورتالىقتىڭ ءبىرى.
جوبا ىسكە قوسىلعاننان كەيىن وڭىردەگى زاماناۋي تەمىرجول سەرۆيستىك دەپوعا اينالىپ، ەلەكتروۆوزدارعا تەحنيكالىق قىزمەت كورسەتۋ جانە جوندەۋ جۇمىستارىن جۇرگىزەتىن نەگىزگى وندىرىستىك ورتالىق رەتىندە جۇمىس ىستەيتىن بولادى. سونىمەن قاتار، جاڭا نىسان اي سايىن 120 لوكوموتيۆ سەكتسياسىنا دەيىن، جىلىنا 1440 سەكتسياعا قىزمەت كورسەتۋگە مۇمكىندىك بەرەدى.
مامانداردىڭ ايتۋىنشا، بۇل جوبا لوكوموتيۆتەردىڭ تەحنيكالىق دايىندىعىن ارتتىرىپ، ىشكى جانە حالىقارالىق باعىتتارداعى تەمىرجول تاسىمالىنىڭ تيىمدىلىگى مەن سەنىمدىلىگىن كۇشەيتۋگە ىقپال ەتەدى. سونداي-اق، ارىس قالاسىنىڭ ورتا ءدالىز بويىنداعى ستراتەگيالىق ورنالاسۋى جاڭا دەپونىڭ وڭىرلىك قىزمەت كورسەتۋ حابى رەتىندەگى ماڭىزىن ارتتىرا تۇسەدى. بۇل ءوز كەزەگىندە قازاقستاننىڭ ترانزيتتىك الەۋەتىن نىعايتۋعا مۇمكىندىك بەرەدى.
جوبا اياسىندا ەلىمىز بويىنشا وڭىرلىك قىزمەت كورسەتۋ ورتالىقتارىن دامىتۋعا باعىتتالعان 50 ميلليون ەۋرو كولەمىندەگى ينۆەستيتسيالىق باعدارلاما جۇزەگە اسىرىلۋدا. سونىڭ ناتيجەسىندە رەسپۋبليكا كولەمىندە 700-گە جۋىق جاڭا جۇمىس ورنى اشىلادى دەپ كۇتىلۋدە.
ساپار بارىسىندا قوناقتارعا قۇرىلىس جۇمىستارىنىڭ بارىسى تانىستىرىلىپ، بولاشاق دەپونىڭ نەگىزگى مۇمكىندىكتەرى مەن ەنگىزىلەتىن زاماناۋي تەحنولوگيالىق شەشىمدەر جونىندە اقپارات بەرىلدى.
