تۇركىستان وبلىسىنىڭ كەنتاۋ قالاسىندا قۇرىلىسى بىلتىر اياقتالعان دايىن پاتەرلەر ءالى كۇنگە قاڭىراپ بوس تۇر. سۋ جاڭا باسپانانىڭ قولدانىسقا بەرىلمەۋىنە كوگىلدىر وتىن مەن جىلۋ قازاندىعىنىڭ ورتالىققا قوسىلماۋى سەبەپ، دەپ حابارلايدى Azattyq Rýhy.
كەنتاۋدا قاڭىراپ تۇرعان ۇيلەردىڭ قۇرىلىسى 2020 جىلدىڭ كۇزىندە اياقتالعان. تۇسكەيدەگى كەنشىلەر قالاسىندا 5 مىڭنان استام ادام ءۇيدىڭ كەزەگىندە تۇر. 5 قاباتتى 10 ءۇي جوسپار بويىنشا پاتەر كەزەگىندە تۇرعان 600 وتباسىنا بەرىلۋى ءتيىس ەدى. بىراق، ون جىلدام استام ءۇي كەزەگىندە تۇرعان كەنتاۋلىقتار دايىن ءۇيدى الا الماي وتىر. ولاردىڭ اراسىندا مۇگەدەك، كوپ بالالى وتباسى سىندى الەۋمەتتىك وسال توپتارعا جاتاتىن جانۇيالاردىڭ سانى از ەمەس. قونىس يەلەرىن كۇتىپ تۇرعان پاتەرلەر دە ءدال وسى الەۋمەتتىك جاعدايى ناشار، جەتىم بالالار، كوپبالالى انالار، بيۋدجەتتىك سالانىڭ قىزمەتكەرلەرى، اپاتتى ءۇيدىڭ تۇرعىندارى سىندى بارلىعى بەس ساناتقا جاتاتىن ادامدارعا بەرىلۋى ءتيىس بولعان.
«ءۇش بالامنىڭ ەكەۋى مۇگەدەك. ەكى بولمەلى پاتەردى جالداۋعا اقشامىز جەتپەگەندىكتەن ءبىر بولمەلى تار ءۇيدى جالدادىق. 9 جىل بولدى ءۇيدىڭ كەزەگىن كۇتىپ جۇرگەلى. مۇگەدەكتىككە الىپ وتىرعان جاردەماقىنى نە تاماققا جەتكىزە المايمىز، نە كيىمگە جەتكىزە المايسىڭ. پاتەراقىسى بار، بۇلاردىڭ ىشەتىن ءدارىسى بار. ءوزىمنىڭ دارىمە دە جەتپەي قالاتىن كۇندەر بولادى»، - دەگەن ەدى وتكەن جىلى باق وكىلدەرىنە بەرگەن سۇحباتىندا ايگۇل قۇدايبەرگەنوۆا.
ارادا 8 اي وتسە دە ماسەلە سول قالپى شەشىلمەگەن. قاڭىراپ تۇرعان ءاربىر ۇيدە 60 پاتەر بار. جاڭادان سالىنعان ۇيلەر ورتالىق جىلۋ قازاندىعىنا قوسىلماعان. تابيعي گاز تاپشى، كەنتاۋ قالاسىنداعى گاز قىسىمى تومەن. قۇرىلىس-مونتاج جۇرگىزگەن مەرگىدەر كومپانيا بولسا دايىن ءۇيدى قالانىڭ قاراماعىنا وتكىزە الماي، كۇزەتۋمەن كەلەدى. قالا اكىمى باستاپقى جوبادا جىلۋ بەرۋ جۇيەسى ناقتى كورسەتىلمەگەنىن، ورتالىق جىلۋ قازاندىعىنا قوسۋعا قاراجات جوعىن ايتىپ وتىر.
«بەلگىلەنگەن ۋاقىتتا بەرىلمەۋىنىڭ سەبەبى، اتالمىش كوپقاباتتى ۇيلەردىڭ جىلىتۋ جۇيەسى گازبەن جىلىتۋعا ارنالعان. بۇگىنگى تاڭدا قالاعا گاز بەرۋ جۇمىستارى جۇرگىزىلۋدە. كوميسسيا ءوز جۇمىسىن اياقتاعان سوڭ تۇرعىن ءۇي كەزەكپەن تۇرعىندارعا بەرىلەتىن بولادى. كەنتاۋ قالاسىن تابيعي گازبەن قامتاماسىز ەتۋ ماقساتىندا 2017 جىلى قۇرىلىسى اياقتالعان «بەينەۋ-شىمكەنت» ماگيسترالدى گاز قۇبىرىنىڭ 1230 شاقىرىمىندا №14 «قىزىلاسكەر» اۆتوماتتاندىرىلعان گاز تاراتۋشى ستانساسى كەنتاۋ قالاسىنا دەيىن گاز تاراتۋ قۇبىرىن سالۋدى مەردىگەر «گازوۆوە حوزيايستۆو «شىمكەنتگاز» جشس اتقارعان. №14 «قىزىلاسكەر» اگتس بويىنشا قازىرگى تاڭدا مەردىگەر مەكەمە تاراپىنان قايتا قىسىممەن تەكسەرۋ جۇمىستارى جۇرگىزىلۋدە. تەكسەرۋ جۇمىستارى تولىققاندى اياقتالعاننان كەيىن ماگيسترالدى قۇبىرعا قوسىلۋ جانە تولتىرۋ جۇمىستارى جۇرگىزىلەتىن بولادى»، - دەپ حابارلادى تۇركىستان وبلىسى كەنتاۋ قالاسى اكىمدىگىنىڭ ءباسپاسوز قىزمەتى.
وبلىستاعى گاز تارتۋ جۇمىستارىنا قاتىسقان كومپانيالاردى ءتىزىپ شىققان اكىمدىك وكىلدەرىنىڭ حابارلاماسىنان ۇققانىمىز – كەنتاۋ قالاسىن كوگىلدىر وتىنمەن قامتاماسىز ەتۋ تولىققاندى جۇرگىزىلمەگەن. ال، جالپى اۋماعى 33 470 شارشى مەتردى قۇرايتىن تۇرعىن ۇيلەردى سالۋعا بيۋدجەتتەن 3,9 ملرد تەڭگە جۇمسالعان.
«كەنتاۋ قالاسىن تابيعي گازبەن قامتاماسىز ەتۋ (ساقينالاۋ جانە ءى، III كەزەڭدەر) مەردىگەر مەكەمەلەر «جول سەرىك» جشس جانە «كومبي ستروي-1» جشس تاراپىنان قۇرىلىس مونتاج جۇمىستارى جۇرگىزىلگەن. بۇل جۇمىستار 2019 جىلى اياقتالىپ قابىلداندى. ساقينالاۋ جانە ءى، III كەزەڭدەرىنىڭ قۇجاتتارى «قازترانسگاز ايماق» اق-نا تىركەلگەن. گاز قۇبىرىنىڭ 2-كەزەڭى كازىرگى تاڭدا تولىعىمەن اياقتالماعان. مەردىگەر مەكەمە «ىنتىماق قۇرىلىس» جشس-ءى تاراپىنان نىساندى اعىمداعى جىلدىڭ سوڭىنا دەيىن تاپسىرىلۋى قاجەت. جوعارىدا اتالعان جۇمىستار تولىققاندى اياقتالعاننان كەيىن قالاعا تابيعي گاز بەرىلەتىن بولادى. سالىنعان كوپقاباتتى تۇرعىن ۇيلەردىڭ اۋلاسىنا ينجەنەرلىك ينفراقۇرىلىم جەلىلەرىن جۇرگىزۋ جانە اباتتاندىرۋ بويىنشا بۇگىنگى تاڭدا 3 اۋلانىڭ قۇرىلىس جۇمىستارى اياقتالعان»، - دەپ جاۋاپ بەردى اكىمدىكتىڭ ءباسپاسوز قىزمەتى.
