قازاقستاندىق زىلتەمىرشى، اۋىر اتلەتيكادان «ريو» وليمپياداسىنىڭ كۇمىس جۇلدەگەرى جازيرا جاپپارقۇل شىمكەنت قالاسى اۋىر اتلەتيكا فەدەراتسياسىنىڭ ۆيتسە-پرەزيدەنتى قىزمەتىنە تاعايىندالدى، دەپ حابارلايدى «ادىرنا» ءتىلشىسى.
كۋالىكتى قر اۋىر اتلەتيكا فەدەراتسياسىنىڭ ۆيتسە-پرەزيدەنتى، شىمكەنت قالاسى بويىنشا فيليال پرەزيدەنتى مۇرات جولدىحوجاەۆ سالتاناتتى تۇردە تابىستادى.
تاعايىنداۋ بارىسىندا ءسوز سويلەگەن مۇرات جولدىحوجاەۆ جازيرا جاپپارقۇلدىڭ سپورتتاعى جەتىستىكتەرى مەن تاجىريبەسى وڭىردەگى اۋىر اتلەتيكانى دامىتۋعا سەرپىن بەرەتىنىن اتاپ ءوتتى. ونىڭ ايتۋىنشا، وليمپيادا جۇلدەگەرىنىڭ فەدەراتسيا جۇمىسىنا ارالاسۋى جاس سپورتشىلارعا موتيۆاتسيا بەرىپ، كاسىبي سپورتتىڭ جاڭا دەڭگەيگە كوتەرىلۋىنە ىقپال ەتەدى.
ءوز كەزەگىندە جازيرا جاپپارقۇل سەنىم بىلدىرگەنى ءۇشىن العىس ايتىپ، وڭىردەگى اۋىر اتلەتيكانى دامىتۋعا بار كۇش-جىگەرىن سالاتىنىن جەتكىزدى. ول جاسوسپىرىمدەر سپورتىنا ەرەكشە كوڭىل ءبولىپ، جاتتىقتىرۋشىلار قۇرامىمەن بىرلەسىپ جۇيەلى جۇمىس جۇرگىزۋ قاجەتتىگىن اتاپ ءوتتى.
ايتا كەتۋ كەرەك، جازيرا جاپپارقۇل – حالىقارالىق ارەنادا ەل نامىسىن ابىرويمەن قورعاعان تاجىريبەلى سپورتشى. مامانداردىڭ پىكىرىنشە، مۇنداي كادرلىق شەشىمدەر ايماقتاعى اۋىر اتلەتيكانىڭ دامۋىنا جاڭا سەرپىن بەرىپ، سپورتشىلاردىڭ حالىقارالىق جارىستارداعى ناتيجەلەرىن ارتتىرۋعا مۇمكىندىك جاسايدى.
