فوتو:«سامۇرىق-ەنەرگو»
«سامۇرىق-قازىنا» اق باسقارماسىنىڭ شەشىمىمەن اڭسار ايداروۆ «سامۇرىق-ەنەرگو» اق باسقارما توراعاسى قىزمەتىنە تاعايىندالدى، دەپ حابارلايدى "ادىرنا".
«سامۇرىق-قازىنا» باسشىسى نۇرلان جاقىپوۆ جاڭا باسشىنى ۇجىمعا تانىستىرىپ، ينۆەستيتسيالىق جوبالاردى بەلگىلەنگەن مەرزىمدە ىسكە اسىرۋ جانە ەلەكتر ستانتسيالارىن ۋاقىتىلى پايدالانۋعا بەرۋ مىندەتىن قويدى.
اڭسار ايداروۆ 2013 جىلدان بەرى قوردىڭ كومپانيالار توبىندا جۇمىس ىستەيدى. بۇعان دەيىن «ەنەرگيا سەميرەچيا» جشس باس ديرەكتورى، سونداي-اق «سامۇرىق-ەنەرگو» اق-دا جوبالىق كەڭسە باسشىسى جانە ينۆەستيتسيالار جونىندەگى باس ديرەكتور قىزمەتتەرىن اتقارعان.
28 قازاندا ەل باسشىسى جولداۋىندا "سامۇرىق-ەنەرگوعا" قاراستى سالانى سىناعان سوڭ جاقىپوۆتىڭ الدىندا وسى كومپناياعا باسشىلىق قىلعان قايرات ماقسۇتوۆ قىزمەتىنەن بوساعان بولاتىن.
پرەزيدەنت توقاەۆ حالىققا ارناعان جولداۋىندا قازاقستاننىڭ ەنەرگەتيكالىق سەكتورىنداعى جاعدايدى سىناعان بولاتىن. ەل باسشىسى قازاقستاننىڭ قىستا كورشىلەرىنەن قىمبات ەلەكتر ەنەرگياسىن ساتىپ الىپ، جازدا ونى الدەقايدا تومەن باعامەن قايتارۋعا ءماجبۇر ەكەنىن ايتقان. پرەزيدەنت سونىمەن قاتار تۇركىستان، قىزىلوردا، الماتى جانە ەكىباستۇز قالالارىندا جاڭا ەلەكتر ستانتسيالارىن ىسكە قوسۋ مەرزىمدەرىن وتكىزىپ العانىنا شۇيلىككەن. پرەزيدەنت قازاقستان جىلىنا 123 ميلليارد كۆت/ساع ەلەكتر ەنەرگياسىن وندىرەتىنىن، بىراق بۇل ەكونوميكالىق دامۋ مەن تسيفرلاندىرۋ ءۇشىن وتە جەتكىلىكسىز ەكەنىنە دە نازار اۋدارعان.
