فوتو: ەرا
اۆستراليادا قالۋ ءۇشىن گۋمانيتارلىق ۆيزالار بەرىلگەن يران ايەلدەر فۋتبول قۇراماسىنىڭ تاعى ءۇش ويىنشىسى ءوز شەشىمدەرىن وزگەرتىپ، ەلدەرىنە قايتاتىن بولدى.
اۆستراليادا وتكەن ازيا كۋبوگىنا كەلىپ، سول جەردە باسپانا سۇراعان جەتى ويىنشىنىڭ تەك ۇشەۋى عانا ەلدە قالدى. وتكەن سارسەنبىدە تاعى ءبىر فۋتبولشى دا يرانعا قايتۋ تۋرالى شەشىم قابىلداعان ەدى.
يران دياسپوراسىنداعى قۇقىق قورعاۋشىلاردىڭ ايتۋىنشا، اۆستراليادان باسپانا سۇراۋ وتىنىشتەرىن فۋتبولشىلار زاحرا سولتان مەشكەحكار، مونا حامۋدي جانە زاحرا ساربالي قايتارىپ العان.
جاعدايعا پىكىر بىلدىرگەن اۆستراليانىڭ ىشكى ىستەر ءمينيسترى ونىڭ ۇكىمەتى بۇل ايەلدەرگە ەلدە قاۋىپسىز بولاشاققا مۇمكىندىك بەرۋ ءۇشىن قولدان كەلگەننىڭ ءبارىن جاساعانىن ايتتى.
«اۆستراليا ۇكىمەتى تەك مۇمكىندىكتەرگە قول جەتكىزۋگە جاعداي جاساپ، ولاردى تۇسىندىرە الادى، بىراق سپورتشىلار وسىنداي اۋىر شەشىمدەر قابىلداۋعا ءماجبۇر بولاتىن جاعدايلاردى وزگەرتۋ ءبىزدىڭ قولىمىزدان كەلمەيدى»، — دەدى توني بەرك مالىمدەمەسىندە.
بۇعان دەيىن بۇل اقپاراتتى يراننىڭ سپورت مينيسترلىگى دە راستاعان بولاتىن.
«يران ايەلدەر فۋتبول قۇراماسىنىڭ ۇلتتىق رۋحى مەن ءپاتريوتيزمى جاۋلاردىڭ جوسپارلارىن جوققا شىعاردى»، — دەلىنگەن مينيسترلىكتىڭ مالىمدەمەسىندە.
سونداي-اق وندا اۆستراليا ۇكىمەتى «ترامپقا قولداۋ كورسەتىپ وتىر» دەپ ايىپتالعان.
يسلام رەۆوليۋتسياسى ساقشىلار كورپۋسىمەن بايلانىستى Tasnim اقپارات اگەنتتىگى ءۇش ويىنشىنىڭ دا كۋالا-لۋمپۋرعا (مالايزيا) ۇشىپ بارا جاتقانىن حابارلادى. ولار سول جەردە كوماندانىڭ باسقا مۇشەلەرىنە قوسىلىپ، باسپانا تۋرالى وتىنىشتەرىن قايتارىپ العاننان كەيىن «وتباسىلارىنىڭ جىلى قۇشاعىنا جانە وتانىنا ورالادى» دەپ ايتىلعان.
