يزرايل مەن اقش كاسپي تەڭىزى جاعالاۋىنداعى باندار-انزالي پورتتى قالاسىنا تاعى دا سوققى جاسادى. بۇل تۋرالى «سۆوبودنىي يران» جازدى، دەپ حابارلايدى «ادىرنا» ءتىلشىسى.
شابۋىلدىڭ ماقساتى يران قورعانىس مينيسترلىگىنە باعىناتىن تەڭىز ورتالىعى بولعان.
سوققىلار تامدجيدي تەڭىز ورتالىعىنا باعىتتالعان. بۇل ورتالىق تەڭىز ونەركاسىبى ۇيىمىنىڭ قۇرامىنا كىرەدى جانە اسكەري كەمەلەردى جوبالاۋ، ءوندىرۋ مەن جوندەۋمەن اينالىساتىن نەگىزگى ستراتەگيالىق نىسان بولىپ سانالادى.
بۇدان الدىن كاسپيدىڭ يران جاعالاۋىنداعى وسى ستراتەگيالىق ورتالىقتى يزرايل عانا اتقىلاسا، بۇگىن وعان اقش قوسىلىپ وتىر.
19 ناۋرىزدا تساحال يراننىڭ كاسپي تەڭىزىندەگى اسكەري-تەڭىز كۇشتەرى مەن پورت ينفراقۇرىلىمىنا سوققى جاساعانىن مالىمدەگەن ەدى. اۋە كۇشتەرىنىڭ جويعىش ۇشاقتارى يران اسكەري فلوتىنىڭ نەگىزگى نىساندارىن نىساناعا العان. «پورت ينفراقۇرىلىمىنداعى ونداعان اسكەري كەمە ورنالاسقان وبەكتىلەرگە سوققى بەرىلدى. ولاردىڭ قاتارىندا زىمىراندىق كەمەلەر مەن كۇزەت كاتەرلەرى بار»، – دەلىنگەن سوندا تساحال تاراتقان مالىمەتتە.
28 اقپاننان باستاپ يزرايل مەن اقش يران اۋماعىنداعى بىرقاتار نىساندارعا، سونىڭ ىشىندە تەگەران قالاسىنا شابۋىل جاساپ كەلەدى. يران پرەزيدەنتى ماسۋد پەزەشكيان ەلدىڭ ەنەرگەتيكالىق جانە ستراتەگيالىق ينفراقۇرىلىمىنا جاسالعان شابۋىلداردى قاتاڭ ايىپتاعان. ونىڭ ايتۋىنشا، مۇنداي ارەكەتتەر جاعدايدى كۇردەلەندىرىپ، باقىلاۋدان تىس سالدارعا اكەلۋى مۇمكىن جانە ونىڭ اسەرى تەك ايماقپەن شەكتەلمەي، جاھاندىق دەڭگەيدە سەزىلۋى ىقتيمال.
