قوستانايدان نيۋ-يورككە 24 توننا قازاقستاندىق ۇن ەكسپورتتالدى. بۇل تۋرالى بۇگىن، 26 ناۋرىزدا اۋىل شارۋاشىلىعى مينيسترلىگى جازدى، دەپ حابارلايدى «ادىرنا» ءتىلشىسى.
«ەلىمىزدەگى KTZ Express كومپانياسى ترانسكاسپي حالىقارالىق كولىك باعىتى ينفراقۇرىلىمىن پايدالانا وتىرىپ، قوستاناي – نيۋ-يورك باعىتى بويىنشا قازاقستاندىق بيداي ۇنىن جەتكىزۋدىڭ جاڭا جونەلتىلىمىن ۇيىمداستىردى. جۇك 2026 جىلعى 10 ناۋرىزدا جىبەرىلىپ، قۇرامىنا قازاقستانداعى ءىرى ۇن تارتۋ كاسىپورىندارىنىڭ ءبىرى ءارى ورتالىق ازياداعى جەتەكشى كومپانيالاردىڭ قاتارىنداعى Salamat Company LLP وندىرگەن 24 توننا ءونىم كىردى. قازاقستاندىق ۇنعا دەگەن سۇرانىستىڭ ارتۋى حالىقارالىق نارىقتاردىڭ ءبىزدىڭ ەلىمىزدىڭ ونىمىنە تۇراقتى قىزىعۋشىلىق تانىتىپ وتىرعانىن كورسەتەدى»،- دەلىنگەن حابارلامادا.
KTZ Express تاسىمالدىڭ باستاپقى كەزەڭىن — جۇكتi كونتەينەرگە تيەۋ مەن ونى قوستانايدان اقتاۋ پورتىنا دەيىن جەتكىزۋدى قامتاماسىز ەتكەن. ودان كەيىن جۇك كاسپي تەڭىزى ارقىلى الات پورتىنا جەتكىزىلىپ، ءارى قاراي پوتي پورتى ارقىلى قارا تەڭىزبەن تاسىمالدانىپ، ستامبۋل قالاسى ارقىلى جەرورتا تەڭىزىنە شىققان. سوڭعى كەزەڭدە باعىت اتلانت مۇحيتى ارقىلى ءوتىپ، جۇك نيۋ-يورك پورتىنا جەتكىزىلەدى.
تەڭىز ارقىلى تاسىمالداۋ الەمدەگى ءىرى كەمە قاتىناسى كومپانيالارىنىڭ ءبىرى — CMA CGM سەرىكتەستىگىمەن جۇزەگە اسىرىلىپ جاتىر. جالپى ترانزيت ۋاقىتى شامامەن 58 كۇندى قۇرايدى.
