الماتى وبلىسىنىڭ پوليتسياسى ناۋرىز تۋرالى داۋلى ۆيدەو جاريالاعان بلوگەردى ۇستادى. روليكتە ول بۇل مەرەكە قازاقستاندا اتاپ وتىلمەۋى ءتيىس ەكەنىن ايتىپ، ونى «مۇسىلمانداردىڭ مەرەكەسى ەمەس» دەپ اتاعان، دەپ حابارلايدى "ادىرنا".
ءىىم مالىمەتىنشە، ەر ادامعا قاتىستى ءدىني ارازدىقتى قوزدىرۋ فاكتىسى بويىنشا قىلمىستىق ءىس قوزعالدى.
«اعىمداعى جىلدىڭ 23 ناۋرىزىندا الەۋمەتتىك جەلىلەرگە جۇرگىزىلگەن مونيتورينگ بارىسىندا TikTok-تا جاريالانعان، ناۋرىز مەرەكەسىنە قاتىستى ءدىني جانە ەتنومادەني سيپاتتاعى جاريا مالىمدەمەلەر قامتىلعان بەينەماتەريال انىقتالدى. جەدەل ءىس-شارالار ناتيجەسىندە 1991 جىلى تۋعان ازامات ك. انىقتالىپ، ۇستالىپ، ۋاقىتشا ۇستاۋ يزولياتورىنا قامالدى»، – دەپ مالىمدەدى ءىىم.
قازىرگى ۋاقىتتا قاجەتتى تەرگەۋ ارەكەتتەرى جۇرگىزىلۋدە. تەرگەۋ مۇددەسىنە بايلانىستى وزگە اقپارات جاريا ەتىلمەيدى.
ايتا كەتەيىك، قىلمىستىق كودەكستىڭ 174-بابى 2-بولىگى ء(دىني ارازدىقتى قوزدىرۋ) بويىنشا، ەگەر بۇل ارەكەتتى قوعامدىق پىكىر كوشباسشىسى جاساسا، 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.
قازنەتتە بلوگەردىڭ "ناۋرىز – قازاقتىڭ دا، مۇسىلماننىڭ دا مەرەكەسى ەمەس جانە ول پارسى (زورواستريزم) داستۇرىنەن كەلگەن" دەگەن مالىمدەمەسىنەن كەيىن داۋ تۋىندادى. ونىڭ ايتۋىنشا، قازاقستانداعى مۇسىلماندارعا بۇل كۇندى اتاپ وتۋگە بولمايدى، ال رۇقسات ەتىلەتىن مەرەكەلەر – تەك ورازا ايت پەن قۇربان ايت.
ۆيدەو الەۋمەتتىك جەلىلەردە تەز تاراپ، قوعام تاراپىنان سىنعا ۇشىرادى. قولدانۋشىلار اۆتوردى تاريحتى بۇرمالادى، ۇعىمداردى شاتاستىردى جانە قوعامدا جىك سالۋعا تىرىستى دەپ ايىپتادى.
ايتا كەتۋ كەرەك، ناۋرىزدىڭ «رۇقسات ەتىلۋى» تۋرالى داۋلار كەي ەلدەردە قاتاڭ سالدارعا اكەلگەن. اۋعانستاندا «تاليبان» بيلىككە قايتا كەلگەننەن كەيىن 21 ناۋرىز رەسمي مەرەكەلەر قاتارىنان الىنىپ، مەملەكەتتىك ءىس-شارالار توقتاتىلدى. بۇقارالىق مەرەكەلەۋ ءىس جۇزىندە جويىلدى.
بۇرىن ناۆرۋز (ناۋرىز) ەلدەگى ەڭ ءىرى مەرەكەلەردىڭ ءبىرى بولعانىمەن، قازىر ول جەكە دەڭگەيدە عانا اتالىپ وتەدى نەمەسە مۇلدە تويلانبايدى.
ايتا كەتسەك، قازاقستان پرەزيدەنتى قاسىم-جومارت توقاەۆ ناۋرىزدى ۇلتتىق ءداستۇردىڭ ماڭىزدى بولىگى جانە بارلىق قازاقستاندىقتارعا ورتاق مەرەكە رەتىندە بىرنەشە رەت اتاپ وتكەن.
«ناۋرىز – رۋحاني تازارۋ مەن جاڭارۋ ۋاقىتى. تازالىق ۇعىمى جان-جاقتى ماعىناعا يە. ەڭ الدىمەن، ول ويدىڭ، سانانىڭ جانە نيەتتىڭ تازالىعىن بىلدىرەدى. ناۋرىز مەرەكەسىندە تازالىق فيلوسوفياسىنىڭ ءمانىن كەڭىنەن ءتۇسىندىرۋ اسا ماڭىزدى»، – دەگەن بولاتىن ول 2026 جىلعى 21 ناۋرىزداعى قۇتتىقتاۋىندا.
