يران اقش اۋە كۇشتەرىنە تيەسىلى الىس قاشىقتاعى راديولوكاتسيالىق باقىلاۋ جانە باسقارۋ ۇشاعى — Boeing E-3 Sentry-ءدىڭ كوزىن جويدى. بۇل تۋرالى BBC جازدى، دەپ حابارلايدى «ادىرنا» ءتىلشىسى.
ۇشاق ساۋد ارابياسىنداعى حانزادا سۇلتان اتىنداعى اۋەبازاعا جاسالعان سوققى كەزىندە قاتتى زاقىمدانعانى ايتىلدى. بۇل بازا ەل استاناسى — ەر-رياد قالاسىنان شامامەن 100 شاقىرىم وڭتۇستىك-شىعىستا ورنالاسقان. جەلىدە جاريالانعان سۋرەتتەردە ۇشاقتىڭ ەكىگە ءبولىنىپ كەتكەنى كورىنەدى.
اقش-تىڭ ورتالىق قولباسشىلىعى ازىرگە بۇل وقيعاعا قاتىستى رەسمي پىكىر بىلدىرگەن جوق.
بۇعان دەيىن امەريكالىق شەنەۋنىك Reuters اگەنتتىگىنە يراندىق سوققى سالدارىنان 12 امەريكالىق اسكەري قىزمەتكەردىڭ جارالانعانىن حابارلاعان ەدى. ال The Wall Street Journal گازەتى كەمىندە ەكى امەريكالىق جانارماي قۇيۋ ۇشاعىنىڭ زاقىمدانعانىن جازعان.
Boeing E-3 Sentry كوبىنە AWACS اتاۋىمەن تانىمال. ول – اقش اۋە كۇشتەرىندەگى ەڭ قىمبات ۇشاقتاردىڭ ءبىرى. قۇنى شامامەن 500 ملن دوللاردى قۇرايدى. ۇشاق توبەسىندەگى ۇلكەن اينالمالى راداردىڭ ارقاسىندا جەردەگى رادارلار بايقامايتىن تومەن ۇشاتىن نىسانداردى انىقتاي الادى. باقىلاۋ راديۋسى 400 شاقىرىمنان اسادى.
The Wall Street Journal گازەتىنىڭ مالىمەتىنشە، اقش اۋە كۇشتەرى Boeing E-3 ۇشاعىن وسى ساناتتاعى نەعۇرلىم جاڭا — Boeing E-7 Wedgetail ۇشاعىمەن الماستىرۋى مۇمكىن، ونىڭ قۇنى 700 ميلليون دوللاردان اسادى.
