يران پرەزيدەنتى ماسۋد پەزەشكيان ناۋرىز مەرەكەسىنە وراي كورشى مۇسىلمان ەلدەرىنە ۇندەۋ جاساپ، يراننىڭ كورشىلەرىمەن قاقتىعىسقا بارۋ نيەتى جوق ەكەنىن مالىمدەدى. بۇل تۋرالى ول X الەۋمەتتىك جەلىسىندە جازدى، دەپ حابارلايدى "ادىرنا""
«سىزدەر – ءبىزدىڭ باۋىرلارىمىز، ءبىز سىزدەرمەن قاقتىعىسۋدى كوزدەمەيمىز»، - دەپ جازدى ول X الەۋمەتتىك جەلىسىندە.
ونىڭ ايتۋىنشا، يران مەن كورشى مۇسىلمان ەلدەرى اراسىنداعى تەكەتىرەستەن تەك يزرايل عانا ۇتادى، ال بۇل ەلدىڭ رەجيمى «مەملەكەتتىك تەرروريزمگە نەگىزدەلگەن».
پەزەشكيان سونداي-اق اقش پەن يزرايل شابۋىلدارى اياسىندا حالىقتى بىرلىككە شاقىرىپ، «يراندى قيىن كەزەڭدەردەن ابىرويمەن الىپ شىعۋ» قاجەتتىگىن اتاپ ءوتتى.
ونىڭ سوزىنشە، اقش-تىڭ يرانعا جاساعان شابۋىلدارى جانە ەلدىڭ كوشباسشىسى الي حامەنەيگە باعىتتالعان ارەكەتتەرى جاھاندىق قۇقىقتىق ءتارتىپتى بۇزۋى مۇمكىن جاڭا ۇدەرىس بولىپ تابىلادى. ەگەر بۇل توقتاتىلماسا، كوپتەگەن ەلدەرگە زيان كەلۋى ىقتيمال.
«ەگەر الەم بۇل داعدارىسقا باتىل قارسى تۇرماسا، ونىڭ وتى كوپشىلىكتى شارپيدى»، — دەدى يران پرەزيدەنتى.
اقش پەن ءيزرايلدىڭ يرانعا قارسى وپەراتسياسى 28 اقپاندا باستالىپ، ءۇشىنشى اپتاعا ۇلاستى. وسى ۋاقىت ىشىندە تاراپتار ءبىر-بىرىنە سوققى جاساپ كەلەدى. شابۋىلدار سالدارىنان الي حامەنەي جانە بىرقاتار جوعارى لاۋازىمدى يراندىق تۇلعالار قازا تاپقانى حابارلاندى.
تەل-اۆيۆ بۇل ارەكەتتەرىنىڭ ماقساتى — تەگەراننىڭ يادرولىق قارۋ الۋىنا جول بەرمەۋ ەكەنىن مالىمدەدى. ال ۆاشينگتون يراننىڭ اسكەري الەۋەتىن جويۋمەن قورقىتىپ، ەل ازاماتتارىن رەجيمدى قۇلاتۋعا شاقىردى.
يران تاراپى ءوز كەزەگىندە قورعانۋعا دايىن ەكەنىن بىرنەشە رەت ايتىپ، قازىرگى جاعدايدا كەلىسسوزدەردى قايتا باستاۋعا نەگىز كورمەيتىنىن جەتكىزگەن.
