پوليتسيا تانىمال زاڭگەر ءارى بلوگەر ادىلەتحان مولداحان تۋرالى جاڭا اقپاراتتى ءبولىستى، دەپ حابارلايدى "ادىرنا" ۇلتتىق پورتالى.
پوليتسيا مالىمەتىنشە، ازامات م.-عا قاتىستى كورىنەۋ جالعان اقپارات تاراتۋ دەرەگى بويىنشا سوتقا دەيىنگى تەرگەۋ باستالعان. قازىرگى تاڭدا كۇدىكتى ۋاقىتشا ۇستاۋ يزولياتورىنا قامالىپ، ءىس بويىنشا تەرگەۋ امالدارى جۇرگىزىلىپ جاتىر. الماتى پوليتسيا دەپارتامەنتى رەداكتسياعا ادىلەتحان مولداحاننىڭ بۇعان دەيىن دە قىلمىستىق جاۋاپكەرشىلىككە تارتىلعانىن راستادى.
ۆەدومستۆونىڭ دەرەگىنشە، ول ادامدار توبىنىڭ الدىن الا ءسوز بايلاسۋى ارقىلى جاسالعان توناۋ قىلمىسى ءۇشىن كىنالى دەپ تانىلعان. وقيعا 2023 جىلدىڭ ناۋرىز ايىندا بولعان.
تەرگەۋ مالىمەتتەرىنە سايكەس، كۇدىكتىلەر تۇرعىن ءۇي ساتىپ الۋ ءۇشىن ءىرى كولەمدە اقشا الىپ جۇرگەن ازاماتتى اڭدىپ، ونىڭ كولىگىن ادەيى توقتاتقان. كەيىن كۇش قولدانىپ، اقشانى اشىق تۇردە يەمدەنىپ، وقيعا ورنىنان بوي تاسالاعان. سوت ۇكىمىمەن وعان پروباتسيالىق باقىلاۋمەن باس بوستاندىعىن شەكتەۋ جازاسى تاعايىندالعان.
پوليتسيا ادىلەتحان مولداحان بۇعان دەيىن ىشكى ىستەر ورگاندارىندا قىزمەت ەتكەنىن حابارلادى. الايدا ول بەلگىلى سەبەپتەرمەن جۇمىستان شىعارىلعان. ۆەدومستۆو وكىلدەرى ونىڭ ارەكەتتەرى پوليتسيا قىزمەتكەرىنىڭ ابىرويىنا نۇقسان كەلتىرگەنىن اتاپ ءوتتى.
ادىلەتحان مولداحان قۇقىق سالاسىندا جۇمىس ىستەيتىن زاڭگەر رەتىندە بەلگىلى. ول قىلمىستىق، ازاماتتىق جانە اكىمشىلىك ىستەر بويىنشا قىزمەت كورسەتىپ، الەۋمەتتىك جەلىلەردە دە كەڭىنەن تانىلعان.
Instagram جەلىسىندەگى پاراقشاسىنا شامامەن 1 ميلليونعا جۋىق ادام جازىلعان. ول رەزونانستى وقيعالارعا پىكىر ءبىلدىرىپ، قۇقىقتىق ماسەلەلەردى ءجيى تالقىلاپ كەلگەن.
سوڭعى ۋاقىتتا ونىڭ ەسىمى الماتىداعى ءال-فارابي داڭعىلىندا بولعان جول-كولىك وقيعاسىنا بايلانىستى ءجيى اتالىپ جۇرگەن ەدى.
الدىن الا مالىمەتتەرگە سايكەس، بلوگەردىڭ ۇستالۋىنا ونىڭ الەۋمەتتىك جەلىلەردە جالعان اقپارات تاراتقانى سەبەپ بولعان. اتاپ ايتقاندا، ول جول اپاتى تۋرالى قوعامدا رەزونانس تۋدىرعان مالىمدەمەلەر جاساعان.
