قازاقستان دزيۋدودان وردوس قالاسىندا (قىتاي) ءوتىپ جاتقان ازيا چەمپيوناتىنداعى ونەرىن اياقتادى، دەپ حابارلايدى “ادىرنا”.
جارىس باعدارلاماسىنىڭ سوڭعى كۇنى ارالاس كوماندالار اراسىندا سايىس ءوتتى. فينالدا قازاقستان قۇراماسى موڭعوليامەن كەزدەستى.
قارسىلاس كوماندا 4:0 ەسەبىمەن جەڭىسكە جەتتى. بۇل كەزدەسۋدە دانا ءابدىروۆا (57 كەلىگە دەيىن), ءانۋار جۇماگەلدين (73 كەلىگە دەيىن), ايدا تويشىبەكوۆا (70 كەلىدەن جوعارى) جانە عالىمجان قىرىقباي (90 كەلىدەن جوعارى) قارسىلاستارىنا جول بەردى.
وسىلايشا، قازاقستان قۇراماسى قۇرلىق بىرىنشىلىگىن التى جۇلدەمەن اياقتادى. بۇعان دەيىن ادىلەت المات (81 كەلىگە دەيىن) التىن مەدال جەڭىپ العان بولاتىن. ال ەسميگۇل كۋيۋلوۆا (63 كەلىگە دەيىن), ابىلايحان جۇبانازار (81 كەلىگە دەيىن), ايدار اراپوۆ (90 كەلىگە دەيىن) جانە ارۋنا جانگەلدينا (78 كەلىگە دەيىن) قولا جۇلدەگە يە بولدى.
