قر پارلامەنتى ءماجىلىسىنىڭ دەپۋتاتى قازىبەك يسا مەملەكەتتىك ءتىلدى بىلمەيتىن “سك فارماتسيا” جشس باسقارما توراعاسى ەرحات ەسقاليەۆتى سىنعا الىپ، ءوزىنىڭ فەيسبۋك پاراقشاسىندا جازبا قالدىردى. بۇل تۋرالى "ادىرنا" ۇلتتىق پورتالى جازادى.
"قر پرەزيدەنتى ق.توقاەۆتىڭ نازارىنا! بۇگىندە 70 پايىزدان اساتىن قازاقتاردىڭ مەملەكەتتىك تىلدەگى اقپارات الۋ قۇقىن شەكتەۋگە، تىلدىك ديسكريميناتسيا جاساۋعا كىم رۇقسات بەردى؟ قر پرەزيدەنتى جانىنداعى ورتالىق كوممۋنيكاتسيالار قىزمەتىندە دەنساۋلىق مينيسترلىگىنىڭ “سك فارماتسيا” جشس باسقارما توراعاسى ەرحات ەسقاليەۆ ءوزىنىڭ الىپ وتىرعان جالاقىسىن قازاقشا ايتا المادى؟! جەپ وتىرعان نانى - الىپ وتىرعان ايلىعىن قازاقشا ايتۋعا ساۋاتى جەتپەيتىندەردەن باسقا دەنساۋلىق مينيسترلىگى “سك فارماتسياعا” باسشى بولاتىن ادام جوق پا، نە ماسقارا بۇل؟! بۇل نە دەگەن بەيشارالىق؟ ءدال قازىر، “وسى “سك فارماتسيا”باسشىسى ورىنىنا كىمدەر ۇمىتكەر بولىپ، وتە الماي قالىپ ەدى، ىشتەرىڭدە مەملەكەتتىك ءتىلدى بىلەتىندەرىڭ بار ما؟” -دەپ فەيسبۋكتە سۇراۋ سالساق، بىرنەشە ۇمىتكەردىڭ شىعاتىنى انىق. سوندا ولاردىڭ ىشىنەن ادەيى قازاقستاننىڭ مەملەكەتتىك ءتىلىن بىلمەيتىن، تەك رەسەيدىڭ مەملەكەتتىك تىلىندە سويلەيتىن ەرحات ەسقاليەۆكە تاڭداپ الۋ نە ءۇشىن كەرەك بولدى؟ قازاق ەلىنىڭ مەملەكەتتىك ءتىلىن - مەملەكەت قۇراۋشى نەگىزگى ۇلتتىڭ ءتىلىنىڭ كونستيتۋتسيالىق، زاڭدىق قۇقىن تاپتاۋ، ديسكريميناتسياعا ۇشىراتۋ - بيلىكتىڭ نەگىزگى ساياساتى ما؟! قايدا ادىلەتتى، جاڭا قازاقستان؟!", - دەپ جازدى قازىبەك يسا.
دەپۋتاتتىڭ ايتۋىنشا، “سك فارماتسيا” جشس باسقارما توراعاسى ەرحات ەسقاليەۆكە رەسەيدىڭ ءبىر گۋبەرنياسىندا وتىرعانداي كۇي تانىتادى.
"مەملەكەتتىك قىزمەت اگەنتتىگى دايىنداعان مەملەكەتتىك قىزمەتكەرلەردەن تالاپ ەتەتىن قازتەست سىناعىندا قازاق ءتىلىنىڭ بالى - 0! سەن جاۋاپ بەرسەڭ دە، بەرمەسەڭ دە، قازاق تىلىنەن 0 ء(نول) دەگەن باعا الاسىڭ؟ ءبىز كەزىندە بۇل ماسەلەنى ءوز باسىنان وتكىزگەن زاڭگەر، ءتىل كۇرەسكەرى جاسۇلان يسانىڭ مالىمەتى بويىنشا “قازاق ءتىلىنىڭ دەڭگەيى -0”دەگەن ماقالا جازعانبىز؟ قازاق ءتىلى - مازاق ءتىلى مە سوندا، اقورداداعى، ۇكىمەتتەگى مىرزالار!؟ وسىدان ەكى جىل بۇرىن ءدال وسى دەنساۋلىق مينيسترلىگى باس سانيتارى قازاقشا سۇراققا جاۋاپ بەرە الماعاندا كۇيىنگەننەن “باس سانيتاردىڭ رەسەي تىلىندەگى ءسوزىن مينيستر اۋدارىپ بەرە مە؟”-دەپ جازىپ ەدىك. تاعى دا قايتالاپ ايتامىز! بۇگىندە 70 پايىزدان اساتىن قازاقتاردىڭ مەملەكەتتىك تىلدەگى اقپارات الۋ قۇقىن شەكتەۋگە، تىلدىك ديسكريميناتسيا جاساۋعا كىم رۇقسات بەردى؟ بىردەن ايتايىق، بريفينگ قازاق ەلىندە ەمەس، رەسەيدە ءوتىپ جاتقانداي بولدى. ويتكەنى مەملەكەتتىك ءتىلدى جيىپ قويىپ، تەك ورىس تىلىندە اقپارات بەرۋشى “سك فارماتسيا” جشس باسقارما توراعاسى ەرحات ەسقاليەۆكە قاراساڭىز، تاۋەلسىز قازاقستاننىڭ استاناسىندا ەمەس، رەسەيدىڭ ءبىر گۋبەرنياسىندا وتىرعانداي... ەركىن وتىردى...", - دەيدى قازىبەك يسا.
قازىبەك يسا مەملەكەتتىك ءتىلدى بىلمەيتىن ەرحات ەسقاليەۆ مەملەكەتتىك قىزمەتكە قالايشا باسشى بولىپ وتقانىنا توقتالدى.
ء"جۋرناليستىڭ “قازاقشا جاۋاپ بەرىڭىز؟”-دەگەنىنە دە قاراماي ورىسشا زۋلاپ بارادى. تەك جۋرناليست مەملەكەتشىلدىك پرينتسيپشىلدىكپەن “مەن سىزگە قازاقشا سۇراق قويدىم، قازاقشا جاۋاپ بەرىڭىز”-دەگەندە بارىپ، تۇتىلدى… قازاقستاننىڭ “سك فارماتسيا” جشس باسقارما توراعاسى ەرحات ەسقاليەۆكە مەملەكەتتىك ءتىلدى، ياعني كونستيتۋتسيا مەن ءتىل تۋرالى زاڭدى اتتاپ-تاپتاپ وتۋگە كىم رۇقسات بەردى؟! قازاقستانعا 30 جىلدىڭ ىشىندە كوشىپ كەلگەن، بۇگىندە 2 ميلليونعا جۋىقتاپ قالعان قانداستارىمىزدىڭ جانە تاۋەلسىزدىك العالى 30 جىلدا قالىپتاسقانداي، ورىس ءتىلىن ءبىلۋدى قاجەت سانامايتىن اۋىلداعى قازاقتاردى قوسقاندا، 10 ميلليوننان اساتىن ازاماتتاردى ايتپاعاندا، بۇگىندە جالپى 70 پايىزدان اساتىن قازاقتاردىڭ مەملەكەتتىك تىلدەگى اقپارات الۋ قۇقىن شەكتەۋگە كىم رۇقسات بەردى؟ پرەزيدەنت جانىنداعى ورتالىق كوممۋنيكاتسيالار قىزمەتىندە بريفينگ وتكىزۋشىلەرگە بەلگىلى ءبىر زاڭدى تالاپتار بولماي ما؟ قىتاي نەمەسە ءشۇرشىت تىلىندە دە وتكىزە بەرۋگە بولا ما؟ ەگەر ەرحات ەسقاليەۆ مەملەكەتتىك ءتىلدى بىلمەسە، مەملەكەتتىك قىزمەتكە باسشى ەتىپ ونى كىم تاعايىندادى؟ ونى جاۋاپتى لاۋازىمدى مەملەكەتتىك قىزمەتكە قويىپ وتىرعاندا ودان مەملەكەتتىك ءتىلدى ءبىلۋ پرەزيدەنت اكىمشىلىگىندە، ۇكىمەتتە، مەملەكەتتىك قىزمەت اگەنتتىگىندە جانە دەنساۋلىق مينيسترلىگىندە تالاپ ەتىلمەگەن بە؟ دەنساۋلىق ساقتاۋ مينيسترلىگى قازاقستان زاڭدارىن ساقتاۋدى جيىپ قويعان با؟ الدە مۇنداي تالاپ ءبىزدىڭ تاۋەلسىز قازاقستاندا 30 جىلدان بەرى ءالى جوق پا؟!", - دەيدى دەپۋتات.
دەپۋتات مەملەكەتتىك ءتىلدى تاپتاپ ۇيرەنگەن "قۇلدىق ۆيرۋستىڭ" جويىلۋىن تالاپ ەتتى.
"ەندەشە، مەملەكەتتىك تىلگە ميى جەتپەيتىندەردى، تەك رەسەي ءتىلىن بىلسە جەتكىلىكتى دەپ ساناپ، قىزمەتكە الا بەرەتىن بولسا، دەنساۋلىق ساقتاۋ ءمينيسترى اجار عينايات نەمەسە وسىنداي قالىڭ ەلدىڭ جاۋاپكەرشىلىگىن جۇكتەگەن لاۋازىمدى قىزمەتكە مەملەكەتتىك ءتىلدى بىلمەيتىن ادامدى تاڭداپ العىزعان ۇكىمەت توراعاسى مەن پرەزيدەنت اكىمشىلىگى باسشىلارى بريفينگكە كەلىپ، ە.ەسقاليەۆتىڭ ءسوزىن مەملەكەتتىك تىلگە اۋدارىپ بەرىپ وتىرسىن. ەلىمىزدەگى 70 پايىزدان استام قازاقستان ازاماتتارى وسىنى تالاپ ەتەدى! ويتكەنى، توتەنشە جاعداي تۋدىرعان جامان ىندەت، كوروناۆيرۋس تە كەتەدى، ال تاۋەلسىز قازاقستان بيلىگىندەگى، مەملەكەتتىك قىزمەتتەگى مەملەكەتتىك ءتىلدى تاپتاپ ۇيرەنگەن قۇلدىق ۆيرۋس وتىز جىلدان بەرى جويىلماي كەلەدى! ەندى وسى ەلدىڭ قان قىسىمىن كوتەرىپ كەلە جاتقان "قۇلدىق ۆيرۋس" توتەنشە جاعداي تۋدىرماۋىن ويلاۋ كەرەك! ءبىزدىڭ ءبارىن ۇمىتىپ كەتۋگە دايار بيلىككە كەشە قاڭتار قاسىرەتىندە كوشەگە شىققانداردىڭ 100 پايىز قازاقتار ەكەنىن ەسكە سالامىز", - دەيدى ول.
"ادىرنا" ۇلتتىق پورتالى
