ورتالىق ازياداعى پايعامباردىڭ العاشقى مۇراجايى اشىلادى. بۇل تۋرالى قازاقستان رەسپۋبليكاسىنىڭ جيددا قالاسىنداعى باس كونسۋلى رۋسلان قوسپانوۆ پەن مەككەدەگى پايعامباردىڭ حالىقارالىق مۇراجايى وكىلدەرىمەن كەزدەسۋىندە ايتىلدى، دەپ حابارلايدى "ادىرنا".
«باس كونسۋل بۇعان دەيىن دۇنيەجۇزىلىك مۇسىلمان ليگاسىنىڭ باسشىلىعىمەن قول جەتكىزىلگەن ۋاعدالاستىقتارعا سايكەس جانە قازاقستان مۇسىلماندارى ءدىني باسقارماسىنىڭ قاتىسۋىمەن، قازىرگى ۋاقىتتا قازاقستان رەسپۋبليكاسىنىڭ ەلورداسى استانا قالاسىندا ورتالىق ازياداعى العاشقى پايعامبار مۇراجايىن اشۋ جونىندەگى جۇمىستار جۇرگىزىلىپ جاتقانىن اتاپ ءوتتى»، – دەپ جازىلعان سىرتقى ىستەر مينيسترلىگىنىڭ حابارلاماسىندا.
مەككەدەگى حالىقارالىق مۇراجايدىڭ ەكسكليۋزيۆتى وپەراتورى – Al-Salam Company (ASC). استانادا سالىنۋى كەرەك مادەني نىساننىڭ وپەراتورى دا ءدال وسى كومپانيا بولادى. ەكى تاراپ ارنايى مەموراندۋمعا قول قويدى. Al-Salam Company باس مەنەدجەرى فايەز كانسارا بۇل باستامانى جوعارى باعالاپ، قازاقستاننىڭ مۇراجايعا قاتىستى وسىنداي كەلىسىمگە قول قويعان العاشقى شەت مەملەكەت بولعانىن ەرەكشە اتاپ ءوتتى.
قۇجاتقا سايكەس، قازاق ازاماتتارىنا مەككەدەگى مۇحاممەد پايعامباردىڭ ءومىربايانى جانە يسلام وركەنيەتى حالىقارالىق مۇراجايىنا كىرۋگە جەڭىلدىكتەر بەرىلەدى. اتالعان باستاما مەككە مەن ءمادينا قالالارىنداعى مۇراجايدىڭ فيليالدارىنا دا قولدانىلادى جانە شەكتەۋلى مەرزىم ىشىندە جۇزەگە اسىرىلادى، ودان كەيىن تاراپتاردىڭ قالاۋى بويىنشا ۇزارتىلۋى مۇمكىن.
