استانادا ۇلتتىق عىلىم اكادەمياسىنىڭ تۇڭعىش پرەزيدەنتى قانىش ساتباەۆتىڭ تۋعانىنا 127 جىل تولۋىنا وراي ەسكەرتكىشىنە گۇل شوقتارىن قويۋ ءراسىمى ءوتتى، دەپ حابارلايدى "ادىرنا".
سالتاناتتى شاراعا عىلىم جانە جوعارى ءبىلىم مينيسترلىگى، استانا قالاسىنىڭ اكىمدىگى وكىلدەرى، پارلامەنت سەناتى مەن ءماجىلىس دەپۋتاتتارى قاتىستى.
عىلىم جانە جوعارى ءبىلىم ءمينيسترى ساياسات نۇربەك بۇل كۇننىڭ ەلىمىزدىڭ عىلىمي قاۋىمداستىعى ءۇشىن ەرەكشە ماڭىزعا يە ەكەنىن اتاپ ءوتتى.
«بۇگىن – قازاقستان عالىمدارى ءۇشىن ەرەكشە كۇن. سەبەبى بۇل كۇن – قازاق عىلىمىنىڭ الىبى، ۇلتتىق عىلىم اكادەمياسىنىڭ نەگىزىن قالاۋشى، عىلىمنىڭ اتاسى قانىش ساتباەۆتىڭ دۇنيەگە كەلگەن كۇنى جانە عىلىم قىزمەتكەرلەرىنىڭ كۇنى. بۇل – ەلىمىزدىڭ عىلىمى مەن بىلىمىنە زور ۇلەس قوسقان تۇلعالاردى ۇلىقتاپ، عىلىمي قاۋىمداستىقتى دارىپتەيتىن ماڭىزدى كۇن. قانىش يمانتايۇلىنىڭ عىلىمي مۇراسى مەن وتاندىق عىلىمعا سىڭىرگەن ەڭبەگى – ۇلتتىڭ رۋحاني قازىناسى. ونىڭ ەسىمى مەن ەڭبەگى ۇرپاقتان ۇرپاققا امانات بولىپ قالا بەرەدى»، – دەدى نۇربەك.
ۆەدومستۆو باسشىسى قازىر عىلىم مەن تەحنولوگيا، يننوۆاتسيالىق دامۋ ەل ەكونوميكاسىن وركەندەتۋدەگى باسىم باعىتتاردىڭ ءبىرى ەكەنىن اتاپ ءوتتى.
مەملەكەت تاراپىنان وتاندىق عىلىمنىڭ دامۋىنا تۇراقتى تۇردە قولداۋ كورسەتىلىپ، عالىمداردىڭ الەۋەتىن ارتتىرۋعا باعىتتالعان شارالار ىسكە اسىرىلىپ جاتقانىن جەتكىزدى.
سونداي-اق ول ەلىمىزدىڭ عىلىمي دامۋىنا ۇلەس قوسىپ جۇرگەن بارلىق عالىمدار مەن زەرتتەۋشىلەرگە العىس ءبىلدىرىپ، قانىش ساتباەۆتىڭ رۋحىنا تاعزىم ەتۋگە كەلگەن قاتىسۋشىلارعا ريزاشىلىعىن جەتكىزدى.
ءىس-شارا سوڭىندا قاتىسۋشىلار عالىم ەسكەرتكىشىنە گۇل شوقتارىن قويىپ، ونىڭ عىلىم مەن ءبىلىم سالاسىنداعى ولشەۋسىز ەڭبەگىنە تاعزىم ەتتى.
