رەسەي پرەزيدەنتى ۆلاديمير پۋتين ارمەنيانىڭ ەۋروپالىق وداققا قوسىلۋ ىقتيمالدىعىنا قاتىستى ەلدە رەفەرەندۋم وتكىزۋدى قولدايتىنىن مالىمدەدى. بۇل تۋرالى ول ەرەۆاندا وتكەن ەۋروپالىق سامميتتەن كەيىن جۋرناليستەرگە ايتتى، دەپ حابارلايدى “ادىرنا”.
«مەنىڭ ويىمشا، ارمەنيا ازاماتتارىنا دا، ءبىزدىڭ باستى ەكونوميكالىق سەرىكتەس رەتىندەگى وزىمىزگە دە بۇل ماسەلەنى مۇمكىندىگىنشە ەرتەرەك انىقتاپ العان دۇرىس. مىسالى، رەفەرەندۋم وتكىزۋگە بولادى»، – دەدى پۋتين 9 مامىر كۇنى جۋرناليستەرگە.
ءپۋتيننىڭ سوزىنشە، ارمەنيا ازاماتتارىنىڭ بولاشاق تاڭداۋىن انىقتاۋ ماڭىزدى. ونىڭ پىكىرىنشە، مۇنداي ماسەلە بويىنشا شەشىمدى حالىقتىڭ ءوزى قابىلداۋى ءتيىس.
«بۇل ءبىزدىڭ ءىسىمىز ەمەس، بىراق ارمەنيا ازاماتتارىنان ولاردىڭ تاڭداۋىن سۇراپ، رەفەرەندۋم وتكىزۋ قيسىندى بولار ەدى. قانداي شەشىم قابىلدايدى – سوعان سايكەس ءبىز دە قورىتىندى جاساپ، ءوزارا ءتيىمدى ءارى وركەنيەتتى تۇردە شەشۋ جولىنا تۇسەر ەدىك»، – دەپ قوستى رەسەي پرەزيدەنتى.
سونىمەن قاتار رەسەي باسشىسى قازىرگى ۋكرايناداعى جاعدايدى مىسالعا كەلتىرىپ، ونىڭ ءبارى ەلدىڭ ەۋرووداققا ۇمتىلىسىنان باستالعانىن ايتتى.
ء«بىز قازىر ۋكراينادا نە بولىپ جاتقانىن كورىپ وتىرمىز. بىراق ءبارى نەدەن باستالدى؟ ۋكراينانىڭ ەو-عا كىرۋگە ۇمتىلىسىنان باستالدى»، – دەدى ول.
بۇرىننان رەسەيمەن تىعىز بايلانىس ۇستانعان ارمەنيا سوڭعى جىلدارى پرەمەر-مينيستر نيكول پاشينياننىڭ تۇسىندا بريۋسسەلمەن قارىم-قاتىناستى نىعايتىپ كەلەدى. بۇل ماسكەۋدىڭ نارازىلىعىن تۋعىزعان.
رەسەي قاۋىپسىزدىك كەڭەسى ەرەۆان ماسكەۋمەن بايلانىسىن ۇزسە، ەل ەكونوميكاسى كۇرت قۇلدىراۋى مۇمكىن ەكەنىن ەسكەرتكەن. گەوساياسي وزگەرىستەر اياسىندا 7 ماۋسىم كۇنى ارمەنيادا پارلامەنت سايلاۋى وتەدى.
2024 جىلى ارمەنيا رەسەي جەتەكشىلىك ەتەتىن ۇجىمدىق قاۋىپسىزدىك تۋرالى شارت ۇيىمىنان شىقتى. بۇعان ماسكەۋدىڭ ازەربايجانمەن قاقتىعىس كەزىندە ارمەنيانى قورعاي الماعانى سەبەپ بولعان.
سونداي-اق ەرەۆان ەۋرووداققا مۇشەلىككە قىزىعۋشىلىق تانىتىپ وتىر.
4 مامىر كۇنى ارمەنيادا ەۋروپالىق ساياسي قاۋىمداستىق ءسامميتى ءوتىپ، وعان ونداعان مەملەكەت پەن ۇكىمەت باسشىلارى قاتىستى. ولاردىڭ اراسىندا ۆلاديمير زەلەنسكي دە بولدى. كەلەسى كۇنى ەرەۆاندا ەو – ارمەنيا ءسامميتى ۇيىمداستىرىلدى.
زەلەنسكيدىڭ ەرەۆانعا ساپارى ماسكەۋدىڭ قاتاڭ رەاكتسياسىن تۋدىردى. رەسەي سىرتقى ىستەر مينيسترلىگى ارمەنيانىڭ زەلەنسكيگە «ەو قولداۋىمەن وتكەن ءىس-شارالاردا الاڭ ۇسىنۋىن» رەسەي ءۇشىن «مۇلدە قابىلداۋعا بولمايدى» دەپ مالىمدەدى.
