«بەستوبە ارەنا» سپورت كەشەنى حالىقارالىق تۋرنيرمەن اشىلدى. ۇلى جەڭىستىڭ مەرەيتويى قارساڭىندا زاماناۋي ۇلگىدەگى «بەستوبە ارەنا» سپورت كەشەنى سالتاناتتى تۇردە پايدالانۋعا بەرىلىپ، ونىڭ اشىلۋى ەركىن كۇرەستەن جاسوسپىرىمدەر اراسىنداعى حالىقارالىق اشىق تۋرنيرگە ۇلاستى.
ەلىمىزدىڭ ەرتەڭى — سالاۋاتتى ۇرپاق تاربيەلەۋ مەملەكەتتىك ساياساتتىڭ باسىم باعىتتارىنىڭ ءبىرى. وسى ماقساتتا بوي كوتەرگەن جاڭا سپورت نىسانى كەنت تۇرعىندارى مەن جاس سپورتشىلار ءۇشىن ناعىز تارتۋ بولدى. ءتۋرنيردىڭ اشىلۋ سالتاناتىندا ءسوز العان بەستوبە كەنتىنىڭ اكىمى سىرىم ءۋاليۇلى قاباي مەن ستەپنوگورسك قالاسى اكىمىنىڭ ورىنباسارى فارحات بايقاسوۆ جينالعان قاۋىمدى جاڭا كەشەننىڭ اشىلۋىمەن قۇتتىقتاپ، بۇل ورتالىقتان بولاشاق وليمپيادا چەمپيوندارى شىعاتىنىنا سەنىم ءبىلدىردى.
جارىستىڭ اۋقىمى وتە كەڭ. بوز كىلەم ۇستىندە باق سىناۋ ءۇشىن 2010-2019 جىلدارى تۋعان 100-دەن استام جاس بالۋان جينالدى. تۋرنيرگە قازاقستاننىڭ ءار وڭىرىنەن كەلگەن كوماندالاردان بولەك، تاجىكستان، وزبەكستان، قىرعىزستان جانە رەسەي مەملەكەتتەرىنىڭ وكىلدەرى قاتىسۋدا. بۇل جاسوسپىرىمدەر اراسىنداعى سپورتتىق بايلانىستىڭ نىعايىپ، ەركىن كۇرەستىڭ حالىقارالىق دەڭگەيدە ناسيحاتتالۋىنىڭ ايقىن كورىنىسى بولسا كەرەك.
ءتۋرنيردىڭ باستى ماقساتى — وسكەلەڭ ۇرپاقتىڭ سپورتقا دەگەن قۇشتارلىعىن وياتۋ، شەبەرلىكتەرىن شىڭداۋ جانە وڭىرارالىق دوستىقتى نىعايتۋ. جارىستىڭ العاشقى كۇنى وتە جوعارى دەڭگەيدە ءوتتى. جاس بالۋانداردىڭ بويىنداعى جەڭىسكە دەگەن جىگەرى مەن قايسارلىعى كورەرمەندەردى ءتانتى ەتتى. ءار بەلدەسۋ تارتىسقا تولى بولىپ، جاس سپورتشىلار وزدەرىنىڭ تەحنيكالىق دايىندىقتارى مەن تاكتيكالىق ادىستەرىن پاش ەتتى.
ءتۋرنيردىڭ ءبىرىنشى كۇنى ءساتتى اياقتالىپ، الدىن الا ىرىكتەۋ كەزەڭدەرىنەن وتكەن ۇزدىكتەر انىقتالدى. ەرتەڭ جارىستىڭ ەڭ قىزىقتى كەزەڭى — فينالدىق بەلدەسۋلەر جالعاسادى. جەڭىمپازدار مەن جۇلدەگەرلەردى ارنايى كۋبوكتار، مەدالدار مەن باعالى سىيلىقتار كۇتۋدە.
بۇل شارا تەك سپورتتىق جارىس قانا ەمەس، سونىمەن قاتار جەرگىلىكتى حالىقتىڭ رۋحىن كوتەرىپ، جاستاردى بىرلىك پەن توزىمدىلىككە تاربيەلەيتىن ۇلكەن مەرەكەگە اينالدى. «بەستوبە ارەنا» كەشەنى الداعى ۋاقىتتا دا تالاي ءىرى دودالاردىڭ ورتالىعى بولاتىنى ءسوزسىز. بارشا قاتىسۋشىلارعا ساتتىلىك تىلەيمىز، ەرتەڭگى كۇن جاڭا ەسىمدەر مەن جارقىن جەڭىستەر سىيلاسىن!
