بيىل شىمكەنت، اتىراۋ جانە پاۆلودارداعى ءۇش ءىرى مۇناي وڭدەۋ زاۋىتىندا جوسپارلى-الدىن الۋ جوندەۋ جۇمىستارى جۇرگىزىلەدى، دەپ حابارلايدى «ادىرنا» ءتىلشىسى inbusiness.kz-كە سىلتەمە جاساپ.
ەنەرگەتيكا مينيسترلىگى بۇل جاعدايعا قاراماستان ىشكى نارىقتا بەنزين مەن ديزەل وتىنىنىڭ تاپشىلىعى كۇتىلمەيتىنىن، سونداي-اق ەگىن ەگۋ ناۋقانى تولىق كولەمدە جانارمايمەن قامتاماسىز ەتىلەتىنىن مالىمدەدى.
مينيسترلىكتىڭ مالىمەتىنشە، ءبىرىنشى بولىپ شىمكەنت مۇناي وڭدەۋ زاۋىتى جوندەۋدەن وتكەن. ونداعى كاپيتالدىق جۇمىستار 27 ناۋرىز بەن 25 ءساۋىر ارالىعىندا 30 كۇنگە سوزىلعان جانە مەرزىمىنەن بۇرىن اياقتالعان.
اتىراۋ مۇناي وڭدەۋ زاۋىتىندا اعىمداعى جوندەۋ 26 ماۋسىم – 15 شىلدە ارالىعىنا جوسپارلانعان، زاۋىت 20 كۇنگە توقتايدى. ال پاۆلودار مۇناي-حيميا زاۋىتى 18 قىركۇيەك – 17 قازان ارالىعىندا 30 كۇندىك كۇردەلى جوندەۋگە جابىلادى.
ۆەدومستۆونىڭ ايتۋىنشا، بارلىق جاعدايدا تەك جەكەلەگەن تەحنولوگيالىق قوندىرعىلار ءىشىنارا توقتاتىلادى. ءۇش زاۋىتتا دا باستاپقى مۇناي وڭدەۋ قوندىرعىلارى جوندەۋگە شىعارىلادى، ويتكەنى ولار ءوندىرىس كولەمىن ايقىندايتىن نەگىزگى بۋىندار بولىپ سانالادى. سونىمەن قاتار، شىمكەنت زاۋىتىندا ديزەل وتىنىن گيدروتازارتۋ جانە كاتاليتيكالىق كرەكينگ قوندىرعىلارى دا جوندەلگەن. Caspi Bitum كاسىپورنى تەك بيتۋم وندىرۋگە ماماندانعاندىقتان، جانارماي وندىرىسىنە اسەر ەتپەيدى.
مينيسترلىك جوندەۋلەردىڭ نارىققا اسەرىن ازايتۋ ءۇشىن بىرنەشە شارا قولدانىلاتىنىن ايتادى: زاۋىتتار كەزەكپەن توقتاتىلادى، بىرەۋى جوندەۋدە بولسا، قالعاندارى قالىپتى رەجيمدە جۇمىس ىستەيدى. سونداي-اق الدىن الا جانارماي قورى جاساقتالىپ، ستراتەگيالىق رەزەرۆتەر پايدالانىلادى.
كوكتەمگى ەگىس جۇمىستارىنا قاتىستى ديزەل وتىنى بويىنشا دا جاعداي تۇسىندىرىلگەن. ەلدەگى جالپى قور 635 مىڭ توننا ديزەلدى قۇرايدى، بۇل اگرارلىق سەكتوردى تولىق قامتاماسىز ەتۋگە جەتكىلىكتى دەپ ەسەپتەلەدى.
2026 جىلعى ەگىن ەگۋ ناۋقانىنا 402 مىڭ توننا جەڭىلدەتىلگەن ديزەل بولىنگەن. ونىڭ باعاسى ليترىنە 281 تەڭگە بولىپ بەكىتىلگەن، بۇل نارىق باعاسىنان شامامەن 15% تومەن. جەتكىزۋ اقپاننان ماۋسىمعا دەيىن جۇزەگە اسادى. باقىلاۋ ءۇشىن تسيفرلىق جانە تۇستىك ماركالاۋ، سونداي-اق ەلەكتروندىق شوت-فاكتۋرا جۇيەسىندە بولەك ۆيرتۋالدى قويما ەنگىزىلگەن.
مينيسترلىك وكىلدەرى ديزەل تاپشىلىعىنىڭ قاۋپى جوق ەكەنىن جانە جوندەۋ جۇمىستارى ىشكى نارىقتاعى باعاعا ايتارلىقتاي اسەر ەتپەيتىنىن اتاپ ءوتتى.
