استانا قالاسىندا جەڭىل رەلستى كولىك (LRT) جۇيەسىنە ارنالعان ۆاگوندار جۋرناليستەرگە تانىستىرىلدى، دەپ حابارلايدى "ادىرنا" ۇلتتىق پورتالى.
قۇرامدار قىتايدا قۇراستىرىلىپ، ەلوردانىڭ كليماتتىق ەرەكشەلىكتەرىنە بەيىمدەلگەن. «City Transportation Systems» جشس باسقارما توراعاسى اسىلبەك دۇيسەباەۆتىڭ ايتۋىنشا، ۆاگوندار قىستا اۋا تەمپەراتۋراسى -30 گرادۋسقا دەيىن تومەندەگەن جاعدايدا سىناقتان وتكىزىلگەن. جوبالاۋ كەزىندە شۋدى ازايتۋعا ەرەكشە ءمان بەرىلگەن.
ونىڭ مالىمەتىنشە، قازاقستان تاراپىنىڭ تالابىنا سايكەس ۆاگون قابىرعالارى قالىڭداتىلىپ، ارنايى رەزەڭكە ماتەريالدار قولدانىلعان. بۇل شەشىم پويىز ىشىندەگى جانە سىرتىنداعى شۋدى بارىنشا تومەندەتۋگە مۇمكىندىك بەرەدى.
LRT قۇرامىنىڭ تەحنيكالىق سيپاتتامالارىنا سايكەس، ءبىر پويىزدىڭ ۇزىندىعى 60 مەتر، بيىكتىگى 3,8 مەتر، ەنى 2,8 مەتر. ءار قۇرام ءتورت ۆاگوننان تۇرادى جانە 600-دەن استام جولاۋشىنى تاسىمالداۋعا قاۋقارلى. LRT 16-17 مامىر كۇندەرى قولدانىسقا بەرىلەدى دەپ كۇتىلۋدە. ال جول ءجۇرۋ قۇنى 200 تەڭگەنى قۇرايدى.
