ماڭعىستاۋ وبلىسىندا نەيروحيرۋرگيا سالاسىندا سيرەك كەزدەسەتىن ءارى اسا اۋىر وپەراتسيالاردىڭ ءبىرى ءساتتى جاسالدى. قاراقيا اۋدانىنا قاراستى قۇرىق اۋىلىنان 7 جاستاعى ءبۇلدىرشىن جەدەل-جاردەم جەلىسىمەن وبلىستىق كوپبەيىندى بالالار اۋرۋحاناسىنا جەتكىزىلگەن. تۇرمىستىق جاراقات سالدارىنان بالانىڭ باسىنا نكت تەمىر قۇبىرى قۇلاپ، ومىرىنە تىكەلەي قاۋىپ تونگەن.
دارىگەرلەردىڭ ايتۋىنشا، بالا اۋرۋحاناعا تۇسكەن ساتتە جاعدايى وتە اۋىر بولعان. ناۋقاسقا اشىق باس-مي جاراقاتى، وڭ جاق توبە سۇيەگىنىڭ باس سۇيەك نەگىزىنە دەيىن جەتكەن جانشىلعان كوپجارىقشاقتى سىنۋى، ميدىڭ جانشىلۋى، پنەۆموتسەفاليا، ليكۆورەيا، ميدىڭ اۋىر دارەجەدەگى ءىسىنۋى، تراۆماتيكالىق شوك پەن پوستگەمورراگيالىق انەميا دياگنوزدارى قويىلعان.
مۇنداي جاعدايلار نەيروحيرۋرگيا تاجىريبەسىندە وتە سيرەك كەزدەسەدى. اسىرەسە، باس سۇيەك نەگىزىنە دەيىن جەتكەن جانشىلعان كوپجارىقشاقتى سىنىق كەزىندە ناۋقاستىڭ امان قالۋىنىڭ ءوزى ۇلكەن كۇرەسكە اينالادى. سەبەبى، مۇنداي جاراقاتتا مي تىندەرى زاقىمدانىپ قانا قويماي، تىنىس الۋ، جۇرەك سوعىسى، قوزعالىس پەن ساناعا جاۋاپ بەرەتىن ماڭىزدى ورتالىقتارعا قاۋىپ تونەدى.
شۇعىل تۇردە نەيروحيرۋرگ دارىگەر ەربول كەنجەۆالوۆ جەتەكشىلىك ەتكەن وپەراتسيا جاسالدى. وتا بارىسىندا باس سۇيەگىنە كۇردەلى ترەپاناتسيا جۇرگىزىلىپ، جانشىلىپ كەتكەن سۇيەك فراگمەنتتەرى الىنىپ، قاتتى مي قابىعىنا پلاستيكا جاسالعان.
دارىگەرلەردىڭ سوزىنشە، مۇنداي كولەمدەگى ءارى بىرنەشە اسقىنۋ قاتار جۇرگەن وپەراتسيالار كوبىنە رەسپۋبليكالىق دەڭگەيدەگى ءىرى نەيروحيرۋرگيالىق ورتالىقتاردا جاسالادى. ال شالعايداعى ماڭعىستاۋ وڭىرىندە، ونىڭ ىشىندە بالالار اۋرۋحاناسى بازاسىندا مۇنداي كۇردەلى وتانىڭ ءساتتى ءوتۋى — ءوڭىر مەديتسيناسىنىڭ دەڭگەيىن كورسەتەتىن ماڭىزدى وقيعا.
كۇردەلى وپەراتسيا كەشكى ساعات 21:40-تا باستالىپ، تۇنگى 00:10-دا اياقتالعان. بىرنەشە ساعاتقا سوزىلعان وتا كەزىندە دارىگەرلەر بالانىڭ ءومىرى ءۇشىن كۇرەسكەن.
– قازىرگى ۋاقىتتا بالانىڭ جاعدايى تۇراقتى. ءبۇلدىرشىن ەسىن جيدى، وزدىگىنەن تاماقتانىپ جاتىر. اكە-اناسىن تانيدى. جاعدايى تۇراقتى باقىلاۋدا، – دەيدى نەيروحيرۋرگ دارىگەر ەربول كەنجەۆالوۆ.
بۇل وقيعا — ايماقتاعى مەديتسينا ماماندارىنىڭ كاسىبي دايىندىعى مەن شۇعىل مەديتسينالىق كومەكتىڭ مۇمكىندىگىن ايقىن كورسەتكەن جاعداي. كەزىندە مۇنداي اۋىر نەيروحيرۋرگيالىق جاراقاتتارمەن ناۋقاستاردى استانا نە الماتىعا شۇعىل تاسىمالداۋ قاجەتتىلىگى تۋىندايتىن. ال بۇگىندە ءدال وسىنداي اسا كۇردەلى وپەراتسيالاردىڭ ماڭعىستاۋدىڭ وزىندە جاسالۋى — ءوڭىر مەديتسيناسىنىڭ جاڭا دەڭگەيگە كوتەرىلگەنىنىڭ بەلگىسى.
