اقش پرەزيدەنتى دونالد ترامپ قىتاي حالىق رەسپۋبليكاسىنا جاساعان ءۇش كۇندىك مەملەكەتتىك ساپارىن اياقتاپ، ۆاشينگتونعا قايتىپ ۇشتى. ساپار اياسىندا ول پەكيندە قىتاي توراعاسى سي تسزينپينمەن جابىق فورماتتا كەزدەسۋ وتكىزىپ، تۇسكى اسقا قاتىستى.
كەزدەسۋ قىتايدىڭ ۇكىمەت رەزيدەنتسياسى - چجۋننانحايدا ءوتتى. كەلىسسوزدەر بارىسىندا تاياۋ شىعىستاعى جاعداي مەن يرانعا قاتىستى شيەلەنىس نەگىزگى تاقىرىپتاردىڭ ءبىرى بولدى. تاراپتار يراننىڭ يادرولىق قارۋعا يە بولۋىنا جول بەرمەۋ جانە ورمۋز بۇعازىنداعى تەڭىز قاتىناسىنىڭ ەركىندىگىن ساقتاۋ قاجەتتىگى جونىندە ورتاق ۇستانىم ءبىلدىردى.
سونىمەن قاتار ەكى ەل كوشباسشىلارى تايۆان ماسەلەسىن، اقش-تىڭ جارتىلاي وتكىزگىش چيپتەر ەكسپورتىنا ەنگىزگەن شەكتەۋلەردى جانە ەكىجاقتى ساۋدا قاتىناستارىن تالقىلادى.
اقش دەلەگاتسياسىنىڭ قۇرامى ەرەكشە بولدى. پرەزيدەنتپەن بىرگە قارجى ءمينيسترى سكوتت بەسسەنت، وتباسى مۇشەلەرى، سونداي-اق ءىرى تەحنولوگيالىق كومپانيالاردىڭ جەتەكشىلەرى - يلون ماسك، تيم كۋك جانە Nvidia كومپانياسىنىڭ باسشىسى دجەنسەن حۋانگ قاتىستى. حۋانگ الياسكاداعى جانارماي قۇيۋ كەزىندە دەلەگاتسياعا قوسىلعان.
ساراپشىلاردىڭ پىكىرىنشە، ءىرى تەحنولوگيا كومپانيالارى باسشىلارىنىڭ ساپارعا قاتىسۋى قىتاي نارىعىنا قولجەتىمدىلىكتى كەڭەيتۋ جانە ەكى ەل اراسىنداعى ساۋدا شيەلەنىسىن جۇمسارتۋ ماقساتىمەن بايلانىستى.
دونالد ترامپ 2017 جىلدان بەرى العاش رەت قىتايعا جاسالعان بۇل ساپاردى ء«ابسوليۋتتى تابىس» دەپ باعالادى. ونىڭ ايتۋىنشا، بىرقاتار ءتيىمدى كەلىسىمدەر جاسالىپ، بۇرىنعى تۇيتكىلدى ماسەلەلەر شەشىلگەن.
ساپار قاتاڭ قاۋىپسىزدىك شارالارى اياسىندا ءوتتى. بۇل ۆاشينگتون مەن پەكين اراسىنداعى ديپلوماتيالىق جانە ەكونوميكالىق شيەلەنىستى ازايتۋعا باعىتتالعان ماڭىزدى كەلىسسوزدەردىڭ ءبىرى رەتىندە باعالانىپ وتىر.
