استاناداعى «Asia Park» ساۋدا-ويىن-ساۋىق ورتالىعىندا «اق جول» دەموكراتيالىق پارتياسىنىڭ قارجىلىق جانە كونسۋلتاتسيالىق قولداۋىمەن تۇسىرىلگەن «الاش جانە ەكونوميكا» اتتى دەرەكتى-درامالىق ءفيلمنىڭ تۇساۋكەسەرى ءوتتى.
كورسەتىلىمگە 250-دەن استام كورەرمەن جينالىپ، زال لىق تولدى. قاتىسۋشىلاردىڭ ءبىر بولىگى ءفيلمدى دالىزدەردە نەمەسە باسپالداقتاردا وتىرىپ تاماشالاۋعا ءماجبۇر بولدى. كورەرمەندەر اراسىندا وتباسىمەن كەلگەندەر دە كوپ كەزدەستى.
ءفيلمنىڭ باستى ماقساتى - الاش قوزعالىسى جەتەكشىلەرىنىڭ تەك ساياسي تۇلعا عانا ەمەس، سونىمەن قاتار ەكونوميكالىق دامۋ، ءوندىرىس جانە نارىقتىق ويلاۋ تۇرعىسىنداعى كوزقاراستارىن كورسەتۋ.
تۋىندىدا ءاليحان بوكەيحان، مىرجاقىپ دۋلاتۇلى، رايىمجان مارسەكۇلى جانە باسقا دا الاش زيالىلارىنىڭ ەل ەكونوميكاسىن دامىتۋ، رەسۋرستاردى ءتيىمدى پايدالانۋ، اگروونەركاسىپ كەشەنىن قالىپتاستىرۋ جانە وندىرىستىك كووپەراتسيانى دامىتۋعا قاتىستى يدەيالارى كەڭىنەن باياندالادى.
سونداي-اق فيلمدە ولاردىڭ جەكە مەنشىك ينستيتۋتىن قولداۋى، قارجى جۇيەسىن دامىتۋ، نەسيەلەۋ مۇمكىندىكتەرىن كەڭەيتۋ جانە تەحنولوگيالىق جاڭاشىلدىقتارعا ۇمتىلىسى تۋرالى كوزقاراستارى قامتىلعان.
تۋىندىعا الاشتانۋشى عالىمدار تۇرسىن جۇرتباي، ەرجان شاعيمولدين، سۇلتان-حان اققۇلى، سونداي-اق ەكونوميست ماقسات حالىق، تاريحشى-زەرتتەۋشى ەلدوس ساۋىرقان جانە باسقا دا ماماندار قاتىسقان.
فيلمدە الاش وردا باسشىلارىنىڭ سالىق ساياساتى، جەرگىلىكتى بيۋدجەت، ازىق-تۇلىك قاۋىپسىزدىگى سياقتى باعىتتارداعى ۇستانىمدارى دا تالدانادى. سونىمەن قاتار ازاماتتىق سوعىس كەزەڭىندەگى رايىمجان مارسەكۇلىنىڭ شەتەلدىك كاسىپكەرلەرمەن بايلانىس ورناتۋ ارەكەتتەرى دە ءسوز بولادى.
جوبادا حح عاسىر باسىنداعى الاش قايراتكەرلەرىنىڭ ەكونوميكالىق كوزقاراستارى مەن قازىرگى قازاقستاننىڭ دامۋ باعىتى اراسىنداعى ساباقتاستىق يدەياسى دا كوتەرىلگەن. اۆتورلاردىڭ پايىمىنشا، قازىرگى تسيفرلاندىرۋ، يننوۆاتسيا جانە جاساندى ينتەللەكتىنى دامىتۋعا باعىتتالعان ساياسات وسى تاريحي ويلاردىڭ جالعاسى رەتىندە قاراستىرىلادى.
ءىس-شارا سوڭىندا كورەرمەندەر مەن قاتىسۋشىلار ءفيلمدى جوعارى باعالاپ، الاش قايراتكەرلەرىنىڭ بۇرىن كەڭىنەن ايتىلماعان ەكونوميكالىق كوزقاراستارىنىڭ اشىلعانىن اتاپ ءوتتى. ۇيىمداستىرۋشىلار مەن ءتۇسىرۋ توبىنا العىس ءبىلدىرىلدى.
