قازاقستاندىق رەجيسسەر ءالىبي مۇقىشەۆتىڭ «No Good In Sight: A ءStory»فيلمى 28-ءشى شانحاي حالىقارالىق كينوفەستيۆالىنىڭ باعدارلاماسىنا ەندى، دەپ حابارلايدى "ادىرنا".
ءفيلمنىڭ العاشقى كورسەتىلىمى 16 ماۋسىم كۇنى شانحاي قالاسىندا وتەدى. وسىلايشا تۋىندى ازياداعى ەڭ بەدەلدى كينوفورۋمداردىڭ بىرىندە قازاقستان كينوونەرىن تانىستىرماق.
كارتينانىڭ ءتۇسىرىلىمى 2023 جىلى باستالعان. ستسەناري اۆتورى ءارى رەجيسسەرى – ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ وقىتۋشىسى ءالىبي مۇقىشەۆ. جوباعا اتالعان وقۋ ورنىنىڭ 70-كە جۋىق ستۋدەنتى قاتىسقان.
فيلم اكە مەن بالا اراسىنداعى قارىم-قاتىناستى ارقاۋ ەتەدى. كەيىپكەرلەر تاعدىرى ارقىلى وتباسىنىڭ ادام ومىرىندەگى ماڭىزى، وتكەن شاقتىڭ ءىزى مەن ومىرلىك تاجىريبەنىڭ تۇلعا قالىپتاسۋىنا ىقپالى كوركەم تۇردە كورسەتىلەدى. سونىمەن قاتار تۋىندى جالعىزدىق، ساعىنىش، جاۋاپكەرشىلىك جانە ار ماسەلەلەرىن قوزعاپ، كورەرمەندى وتباسى قۇندىلىعى، تاعدىر تاڭداۋى مەن جان تىنىشتىعى جايىندا ويلانۋعا جەتەلەيدى.
ايتا كەتەيىك، 1993 جىلدان بەرى وتكىزىلىپ كەلە جاتقان شانحاي حالىقارالىق كينوفەستيۆالى – قىتايداعى حالىقارالىق كينوپروديۋسەرلەر قاۋىمداستىقتارى فەدەراتسياسى (FIAPF) «ا» ساناتىنا اككرەديتتەگەن العاشقى كينوفەستيۆال.
