قوعامداعى ەڭ ءالسىز ءارى قورعانسىز توپ – بالالار. اسىرەسە اتا-اناسىنان ەرتە ايىرىلعان جەتىم بالالاردىڭ تاعدىرى ءاردايىم جۇرەككە اۋىر تيەدى. سول تاعدىردىڭ ءبىر ۇزىگىن شىنايى ءارى تەرەڭ جەتكىزەتىن «تاستاماشى، انا!» كوركەم ءفيلمى كورەرمەنگە وي سالاتىن تۋىندى بولىپ شىقتى.
ءفيلمنىڭ باستى كەيىپكەرى – ون ءبىر جاستاعى يلياس. اتا-اناسىنان ايىرىلعان سوڭ ول اپكەلەرىمەن بىرگە بالالار ۇيىنە ورنالاستىرىلادى. وسى ساتتەن باستاپ يلياستىڭ بالالىق شاعى اياقتالىپ، قاتاڭ ەرەجەلەر مەن سالقىن قاتىناسقا تولى جاڭا ءومىر باستالادى. بالالار ۇيىندەگى ءتارتىپ، قاتىگەزدىك پەن نەمقۇرايلىلىق ونىڭ جان دۇنيەسىن جارالايدى. مۇندا ەڭ باستىسى – سۇيىسپەنشىلىك، قامقورلىق پەن قاراپايىم ادامگەرشىلىك – جەتىسپەيدى.
يلياس تەك قاتارلاستارىنىڭ ەمەس، بالالاردى قورعاۋى ءتيىس ەرەسەكتەردىڭ دە قاتىگەزدىگىنە تاپ بولادى. ءتىپتى دەنساۋلىعى ەسكەرۋسىز قالىپ، مەديتسينالىق كومەك كورسەتىلمەيدى. ءوز تاعدىرىمەن جالعىز كۇرەسۋگە ءماجبۇر بولعان بالا اۋىر سىناقتاردان ءوتىپ، ەرتە ەسەيەدى. ونىڭ ءاربىر قادامى – ءومىر ءۇشىن كۇرەس، ادامدىق قادىر-قاسيەتتى ساقتاۋ تالپىنىسى.
الايدا بۇل وقيعا ويدان شىعارىلعان قيال ەمەس. فيلم ايگيز بايمۇحامەتوۆتىڭ اتتاس شىعارماسى نەگىزىندە تۇسىرىلگەن. كارتينا ءبىر بالانىڭ تاعدىرى ارقىلى جەتىم بالالاردىڭ شىنايى ءومىرىن، ولاردىڭ مەيىرىمگە، قامقورلىققا جانە جاقسى بولاشاققا دەگەن ءۇمىتىن كورسەتەدى. فيلم دە، كىتاپ سەكىلدى، كەڭ اۋديتورياعا ارنالعان: بالالار ءۇشىن – وتباسى مەن اتا-انالىق قامقورلىقتىڭ قۇندىلىعىن ۇعىندىرۋ، ەرەسەكتەر ءۇشىن – بالانىڭ سۇيىسپەنشىلىككە، نازار مەن جان جىلۋىنا دەگەن قاجەتتىلىگىن ەسكە سالۋ.
ءفيلمنىڭ ءتۇسىرىلىم جۇمىستارى 2025 جىلدىڭ 10 جەلتوقسانىندا تەكەلى قالاسىندا باستالدى. جوباعا 70 ادامنان تۇراتىن شىعارماشىلىق توپ قاتىسىپ، پروديۋسەرلەرى – سقابىل جادىرا مەن دارحان بالاجانوۆ، اتقارۋشى پروديۋسەرى – ساپارباي جانسەرىك.
پروديۋسەر سقابىل جادىرا جوبامەن ءبولىسىپ:
"كىتاپتى العاش وقىعاندا ءوزىمدى انا رەتىندە ەلەستەتتىم. ءبىر كەزدەرى مەن دە اۋىرعانمىن، سول سەبەپتى كەيىپكەردىڭ ورنىنا وڭاي قويا الدىم. يلياس پەن ونىڭ وتباسىنىڭ تاعدىرى مەنى قاتتى تولقىتتى. بۇگىندە كوپ ادام جۇمىستىڭ سوڭىندا ءجۇرىپ، ءوز دەنساۋلىعىنا كوڭىل بولمەيدى. ال ەگەر اتا-اناعا بىردەڭە بولسا، بالالارعا كىم قامقور بولادى؟ بۇل فيلم تەك بالالارعا ەمەس، بىزگە دە وي سالۋى ءتيىس. بولاشاق تۋرالى ويلانۋدىڭ ماڭىزىن ەسكە سالادى".
پروديۋسەردىڭ ايتۋىنشا، بالا ءۇشىن ەڭ ماڭىزدىسى – انا مەن اكەنىڭ قاتار بولۋى. بىراق تاعدىر بىرىنەن ايىرسا دا، ءۇمىت ۇزبەۋ كەرەك. قيىندىققا قارسى تۇرىپ، كۇرەسۋدى ۇيرەنۋ – ءومىردىڭ باستى ساباعى. سەبەبى ءومىر كەيدە كۇتپەگەن مۇمكىندىكتەردى سىيلايدى.
فيلم اتا-انانىڭ جاۋاپكەرشىلىگى، بالانىڭ رۋحاني بەرىكتىگى جانە بولاشاققا دەگەن سەنىم تاقىرىپتارىن تەرەڭ قوزعايدى. قاتال ءارى تراگەديالىق ساتتەرگە قاراماستان، كارتينا ءۇمىت پەن جارىققا تولى. يلياس ءوز تاعدىرى ارقىلى ەڭ قيىن جاعدايدا دا ادامدىق قادىر-قاسيەتتى، بىلىمگە دەگەن قۇشتارلىقتى جانە جاقسى ومىرگە دەگەن ارمانىن ساقتاپ قالۋعا بولاتىنىن دالەلدەيدى.
ءفيلمنىڭ العاشقى كورسەتىلىمىنە قازاقستان رەسپۋبليكاسى پرەزيدەنتىنىڭ كەڭەسشىسى مالىك نۇرجانۇلى، قانات-سۆەتا ايتباەۆتار جانە جاس جازۋشى ايگيز بايمۇحامەتوۆ قاتىستى.
پرەزيدەنت كومەكشىسى مالىك نۇرجانۇلى:
"شىنى كەرەك، ءبارىمىز تەك تولقىپ قانا ەمەس، جىلادىق. كوزىمىزدەن جاس اقتى. سەبەبى سوزبەن جەتكىزۋ وتە قيىن. وسىندا وتىرعانداردىڭ كوپشىلىگى بالا تاربيەلەپ وتىرعان اتا-انالار، اتا-اجەلەر. جاستارىمىز، بولاشاق اتا-انالارىمىز وتىر. سوندىقتان دا شىن مانىندە ايگيز باۋىرىمزدىڭ تۋىندىسى كينو لەنتادا، ۇلكەن ەكراننان كورىنىس تاۋىپ، كورەرمەن جۇرەگىنە جەتىپ وتىر" - دەپ پىكىر ءبىلدىردى.
كينونىڭ باستى ءرولىن سومداعان باقىت حادجيباەۆ:
"بۇل جەردە ءوز جۇبايىنان ايىرىلىپ، بالالارىنا انا ورنىنا انا، اكە ورنىنا اكە بولعان ادامنىڭ ءرولىن وينادىم. بىراق، كوپ ۇزاماي اكە دە قايتىس بولادى. بالالاردىڭ تاعدىرى وتە اۋىر. بىراق مەنىڭ ءرولىم ارقىلى ەر ازاماتتىڭ جاقسى قاسيەتتەرى بالانىڭ بويىنا سىڭىرىلەدى" – دەيدى اكتەر.
ال تەكسەرۋشىنىڭ ءرولىن ويناعان اقمونشاق نۇرتازا:
"بالا كەزدەن ونەرگە قۇشتار بولدىم. فيلمگە ءتۇسۋ ماعان جاڭا بەلەس بولدى. كىشكەنتاي ءرولدى سومداسام دا ۇلكەن شابىت الدىم. كينوعا ءتۇسۋ ارقىلى مەن ونەر ادامدارىن ودان سايىن باعالاي باستادىم. ءار تۋىندىنىڭ ارتىندا ۇلكەن قاجىرلى ەڭبەك جاتىر، سول ءۇشىن ءوزىمنىڭ ۇستاز بولعانىما قۋانىشتىمىن" – دەيدى ول.
«تاستاماشى، انا!» ءفيلمى اتا-انالىق جاۋاپكەرشىلىك، بالا تاعدىرىنا قامقورلىق پەن ءۇمىتتىڭ ماڭىزدىلىعىن جەتكىزەتىن، جۇرەكتى تەبىرەنتەتىن تۋىندى بولىپ تابىلادى. 5 اقپاننان باستاپ قازاقستاننىڭ بارلىق كينوتەاترلارىندا كورسەتىلىم بولادى.
