بەلگىلى كينورەجيسسەر ارداق امىرقۇلوۆ 71 جاسقا قاراعان شاعىندا ومىردەن وزدى. قارالى حاباردى بۇگىن، 5 تامىزدا مادەنيەت جانە اقپارات مينيسترلىگى جەتكىزدى، دەپ حابارلايدى «ادىرنا» ءتىلشىسى.
«ارداق امىرقۇلوۆتىڭ «وتىراردىڭ كۇيرەۋى»، «اباي»، «قوش بول، گۇلسارى!» جانە وزگە دە فيلمدەرى ۇلتتىق كينو ونەرىنىڭ التىن قورىنان ورىن الدى. ونىڭ شىعارمالارى ەل تاريحىن، حالىقتىڭ رۋحاني قۇندىلىقتارىن جانە ادام تاعدىرىن تەرەڭ بەينەلەۋىمەن ەرەكشەلەنىپ، كورەرمەن قاۋىم مەن كاسىبي ورتانىڭ جوعارى باعاسىنا يە بولدى.
ارداق جامانسارىۇلىنىڭ جارقىن بەينەسى، ونەگەلى عۇمىرى مەن قازاق مادەنيەتى مەن كينو ونەرىنىڭ دامۋىنا سىڭىرگەن ەلەۋلى ەڭبەگى حالىق جادىندا ماڭگى ساقتالادى. مارقۇمنىڭ جانى ءجانناتتان جاي تاۋىپ، يمانى سالامات، جاتقان جەرى جارىق، توپىراعى تورقا بولسىن!»– دەلىنگەن حابارلامادا.
ارداق امىرقۇلوۆ 1955 جىلى 10 جەلتوقساندا جامبىل وبلىسى تالاس اۋدانىنداعى اقكول اۋىلىندا دۇنيەگە كەلگەن. 1977 جىلى پەداگوگيكالىق ينستيتۋتتى ءتامامداپ، ەڭبەك جولىن «قازاقفيلم» كينوستۋدياسىندا باستاعان. كەيىن ماسكەۋدەگى بۇكىلوداقتىق كينەماتوگرافيا ينستيتۋتىنىڭ رەجيسسەرلىك فاكۋلتەتىن ءبىتىرىپ، كاسىبي كينو سالاسىندا تەرەڭ ءبىلىم العان.
1992–2002 جىلدارى «قازاقفيلم» كينوستۋدياسىنىڭ ديرەكتورى قىزمەتىن اتقارىپ، ۇلتتىق كينو ءوندىرىسىنىڭ دامۋىنا تىكەلەي ىقپال ەتكەن. سونىمەن قاتار الماتىداعى تەاتر جانە كينو سالاسىنداعى وقۋ ورنىندا ءدارىس بەرىپ، پروفەسسور اتانعان. ونىڭ «وتىراردىڭ كۇيرەۋى» ەكى سەريالى ءفيلمى، قازاقستان مەملەكەتتىك سىيلىعىنا، مونرەال قالاسىندا (كانادا) وتكەن حالىقارالىق كينوفەستيۆالدا كينوسىنشىلار حالىقارالىق اسسوتسياتسياسىنىڭ "فيپرەسسي" جۇلدەسىنە، فيگۋەيرا دە فوش قالاسىنداعى (پورتۋگاليا) حالىقارالىق كينوفەستيۆالدىڭ «كۇمىس تاباقشا» جۇلدەسىنە جانە اشحابادتا (تۇرىكمەنستان) 1 حالىقارالىق كينوفەستيۆالدىڭ «كۇمىس جارتى اي» باس جۇلدەسىنە يە بولعان. ال «اباي» ەكى سەريالى ءفيلمى تاشكەنت (وزبەكستان) كينوفەستيۆالىنىڭ «كۇمىس سەمۋرگ» جۇلدەسىن، گاتچيناقالاسىندا (رەسەي) وتكەن «ادەبيەت جانە كينو» 5-كينوفەستيۆالىندە «جاستار قوعامدىق قازىلار القاسىنىڭ جۇلدەسىن» جانە بۇكىلوداقتىق مەملەكەتتىك كينەماتوگرافيا ينستيتۋتىنىڭ مەدالىن العان.
