Belgılı kinorejisser Ardaq Ämırqūlov 71 jasqa qaraǧan şaǧynda ömırden ozdy. Qaraly habardy bügın, 5 tamyzda Mädeniet jäne aqparat ministrlıgı jetkızdı, dep habarlaidy «Adyrna» tılşısı.
«Ardaq Ämırqūlovtyŋ «Otyrardyŋ küireuı», «Abai», «Qoş bol, Gülsary!» jäne özge de filmderı ūlttyq kino önerınıŋ altyn qorynan oryn aldy. Onyŋ şyǧarmalary el tarihyn, halyqtyŋ ruhani qūndylyqtaryn jäne adam taǧdyryn tereŋ beineleuımen erekşelenıp, körermen qauym men käsıbi ortanyŋ joǧary baǧasyna ie boldy.
Ardaq Jamansaryūlynyŋ jarqyn beinesı, önegelı ǧūmyry men qazaq mädenietı men kino önerınıŋ damuyna sıŋırgen eleulı eŋbegı halyq jadynda mäŋgı saqtalady. Marqūmnyŋ jany jännattan jai tauyp, imany salamat, jatqan jerı jaryq, topyraǧy torqa bolsyn!»– delıngen habarlamada.
Ardaq Ämırqūlov 1955 jyly 10 jeltoqsanda Jambyl oblysy Talas audanyndaǧy Aqköl auylynda düniege kelgen. 1977 jyly pedagogikalyq institutty tämamdap, eŋbek jolyn «Qazaqfilm» kinostudiiasynda bastaǧan. Keiın Mäskeudegı Bükılodaqtyq kinematografiia institutynyŋ rejisserlık fakultetın bıtırıp, käsıbi kino salasynda tereŋ bılım alǧan.
1992–2002 jyldary «Qazaqfilm» kinostudiiasynyŋ direktory qyzmetın atqaryp, ūlttyq kino öndırısınıŋ damuyna tıkelei yqpal etken. Sonymen qatar Almatydaǧy teatr jäne kino salasyndaǧy oqu ornynda därıs berıp, professor atanǧan. Onyŋ «Otyrardyŋ küireuı» ekı seriialy filmı, Qazaqstan Memlekettık syilyǧyna, Monreal qalasynda (Kanada) ötken halyqaralyq kinofestivalda kinosynşylar halyqaralyq assosiasiiasynyŋ "Fipressi" jüldesıne, Figueira De Foş qalasyndaǧy (Portugaliia) halyqaralyq kinofestivaldyŋ «Kümıs tabaqşa» jüldesıne jäne Aşhabadta (Türıkmenstan) 1 halyqaralyq kinofestivaldyŋ «Kümıs jarty ai» Bas jüldesıne ie bolǧan. Al «Abai» ekı seriialy filmı Taşkent (Özbekstan) kinofestivalınıŋ «Kümıs Semurg» jüldesın, Gatchinaqalasynda (Resei) ötken «Ädebiet jäne kino» 5-kinofestivalınde «Jastar qoǧamdyq qazylar alqasynyŋ jüldesın» jäne Bükılodaqtyq Memlekettık Kinematografiia institutynyŋ medalın alǧan.
