فيلوسوفيا عىلىمدارىنىڭ دوكتورى، حالىقارالىق دەڭگەيدە تانىمال زەرگەر، كاسىپكەر ءىلياس مۇحامەد-حالەلۇلى سۇلەيمانوۆ ومىردەن ءوتتى، دەپ حابارلايدى "ادىرنا" ۇلتتىق پورتالى.
قارالى حاباردى Facebook جەلىسىندە قوعام بەلسەندىسى قانات ەسكەندىر مالىمدەدى.
«مەملەكەتكە ابىروي سىيلاپ، ءوزى ەسكەرۋسىز كەتتى… قازاق زەرگەرلىك كاسىپونەر تاريحى ۇلكەن تۇلعاسىن جوعالتتى»، – دەپ جازدى ول.
ءىلياس سۇلەيمانوۆ 1964 جىلى 25 ماۋسىمدا الماتى قالاسىندا دۇنيەگە كەلگەن. اكەسى مۇحامەد-حالەل سۇلەيمانوۆ – فيزيك، پۋبليتسيست، اناسى ءۇمىتجان شايكەمەلەۆا – فيزيولوگ، ۇزاق جىلدار عىلىم اكادەمياسىندا قىزمەت اتقارعان. ءىلياستىڭ ەسىمى كورنەكتى مەملەكەت قايراتكەرى ءىلياس ومارۇلى وماروۆتىڭ قۇرمەتىنە قويىلعان.
بولاشاق زەرگەر ءبىلىمىن اتاقتى فيزيكا-ماتەماتيكا مەكتەبىندە باستاپ، كەيىن قازاق مەملەكەتتىك ۋنيۆەرسيتەتىنىڭ ماتەماتيكا فاكۋلتەتىن ءتامامدادى. ستۋدەنتتىك شاعىندا قازمۋ-دە «رەزونانس» ساياسي كلۋبىن باسقارىپ، قوعامدىق-ساياسي ورتادا بەلسەندىلىگىمەن كوزگە ءتۇستى. اسكەر قاتارىندا اۋعانستاندا قىزمەت ەتىپ، اعا لەيتەنانت شەنىندە ەلگە ورالدى.
اسكەردەن كەيىن قازاق كسر عىلىم اكادەمياسىنىڭ فيلوسوفيا جانە قۇقىق ينستيتۋتىندا اسپيرانتۋرادا وقىدى. تاۋەلسىزدىك جىلدارىنىڭ باسىندا زەرگەرلىك ونەرگە بەت بۇرىپ، 1991 جىلى قازاقستانداعى العاشقى جەكە زەرگەرلىك كاسىپورىنداردىڭ ءبىرى – «زەرگەر» فيرماسىن قۇردى.
كەيىن «Zerger Ilyas» برەندىمەن تانىلعان كومپانيا 1990 جىلدارى وتاندىق زەرگەرلىك بۇيىمداردى ەۋروپا نارىعىنا ەكسپورتتاعان العاشقى كاسىپورىنداردىڭ بىرىنە اينالدى. 1995 جىلى ءىلياس سۇلەيمانوۆ پاريجدە وتكەن «BIJOHRCA» حالىقارالىق كورمەسىنە قاتىسىپ، قازىلار القاسىنىڭ قاتاڭ ىرىكتەۋىنەن وتكەن قازاقستاندىق زەرگەر رەتىندە تاريحتا قالدى.
ءىلياس سۇلەيمانوۆ تەك كاسىپكەر عانا ەمەس، قوعامعا جاناشىر مەتسەنات رەتىندە دە تانىلدى. ونىڭ باسشىلىعىمەن «زەرگەر» كومپانياسى اۋعان سوعىسى ارداگەرلەرىنە پاتەرلەر مەن اۆتوكولىكتەر سىيلاپ، ەمدەلۋگە جانە قاجىلىق ساپارعا بارۋىنا قولداۋ كورسەتتى. سونداي-اق ينتەرناتسيوناليست-جاۋىنگەرلەرگە ارنالعان ەسكەرتكىش قۇرىلىسىنا، ادەبي جيناقتاردىڭ جارىق كورۋىنە دەمەۋشىلىك جاسادى.
