AMANAT فراكتسياسىنىڭ دەپۋتاتتارى قازاقستان پرەمەر-ءمينيسترى ولجاس بەكتەنوۆكە جاپپاي ترەنينگتەر مەن ءىس-شارالاردا بىلاپىت سوزدەردى اشىق قولدانۋ فاكتىلەرىنە قۇقىقتىق ءارى ەتيكالىق باعا بەرۋ تۋرالى دەپۋتاتتىق ساۋال جولدادى.
ءتيىستى ساۋالدى دەپۋتات نۇرسۇلتان بايتىلەسوۆ جاريا ەتتى.
وتىنىشتە استانادا وتكەن «ترانسفورماتسيالىق» ترەنينگتەردىڭ بىرىندە قاتىسۋشىلاردىڭ پسيحولوگيالىق تاجىريبە دەگەن جەلەۋمەن جاپپاي بەيادەپ سوزدەر قولدانعان ۆيدەوسى قوعامدا كەڭ رەزونانس تۋدىرعانى ايتىلعان.
دەپۋتاتتاردىڭ مالىمەتىنشە، اتالعان شارانى ۇيىمداستىرۋشى ۇساق بۇزاقىلىق فاكتىسى بويىنشا اكىمشىلىك جاۋاپكەرشىلىككە تارتىلعان.
سونىمەن قاتار دەپۋتاتتار مۇنى ءبىر رەتتىك جاعداي ەمەس، قوعامداعى اۋقىمدى تەندەنتسيانىڭ كورىنىسى دەپ سانايدى.
ء«ىس جۇزىندە ءبىز قوعامدىق كوممۋنيكاتسياداعى رۇقسات ەتىلگەن شەكارالاردىڭ بۇلىڭعىرلانىپ بارا جاتقانىن كورىپ وتىرمىز. بىلاپىت سوزدەر قالىپتى قۇبىلىس رەتىندە قابىلدانا باستادى»، – دەلىنگەن دەپۋتاتتىق ساۋالدا.
دەپۋتاتتاردى بالالارعا اسەرى الاڭداتادى
ساۋال اۆتورلارى اسىرەسە ءبىلىم بەرۋ جانە اعارتۋشىلىق ورتادا اگرەسسيۆتى ءارى وبستسەندى لەكسيكانىڭ ناسيحاتتالۋى الاڭداتارلىق جاعداي ەكەنىن اتاپ ءوتتى.
ولاردىڭ پىكىرىنشە، ماسەلە جۇيەلى سيپات الىپ بارادى. ويتكەنى بالالار مەن جاسوسپىرىمدەر ينتەرنەتتە، الەۋمەتتىك جەلىلەردە جانە كۇندەلىكتى ومىردە مۇنداي كونتەنتپەن ءجيى بەتپە-بەت كەلەدى.
دەپۋتاتتار «قازاقستان رەسپۋبليكاسىنداعى بالانىڭ قۇقىقتارى تۋرالى» زاڭنىڭ 36-بابىنا سايكەس مەملەكەت كامەلەتكە تولماعانداردى ولاردىڭ رۋحاني جانە ادامگەرشىلىك دامۋىنا زيان كەلتىرەتىن اقپاراتتان قورعاۋعا مىندەتتى ەكەنىن ەسكە سالدى.
دەپۋتاتتار نە ۇسىندى؟
AMANAT فراكتسياسى ۇكىمەتكە:
— جاپپاي ترەنينگتەر مەن ءىس-شارالاردا بىلاپىت سوزدەردى جاريا قولدانۋعا رەسمي قۇقىقتىق جانە ەتيكالىق باعا بەرۋدى;
— ترەنينگ، سەمينار جانە لەكتسيا ۇيىمداستىرۋشىلارىنا ناقتى ەتيكالىق تالاپتار ەنگىزۋ مۇمكىندىگىن قاراستىرۋدى;
— اسىرەسە جاستار مەن الەۋمەتتىك جەلىلەر اراسىندا سويلەۋ مادەنيەتىن، سىيلاستىق قاعيدالارىن جانە «ادال ازامات» قۇندىلىقتارىن ناسيحاتتاۋدى كۇشەيتۋدى ۇسىندى.
ساۋالدا سوزگە قۇرمەت پەن قارىم-قاتىناس مادەنيەتى مەملەكەتتىك ساياسات پەن قوعامدىق تاربيەنىڭ ماڭىزدى بولىگى بولىپ قالۋى ءتيىس ەكەنى دە اتاپ وتىلگەن.
