ماڭعىستاۋ وبلىسى ءماسليحاتىنىڭ دەپۋتاتى، KazPetroDrilling كومپانياسىنىڭ وڭىرلىك ۆيتسە-پرەزيدەنتى ەربول ايتۋوۆ اقتاۋداعى جەكەمەنشىك كلينيكادا جاسالعان وتادان كەيىن قايتىس بولدى، دەپ حابارلايدى "ادىرنا".
49 جاستاعى ەربول ايتۋوۆ يەك تۇسىنا ليپوساكتسيا جاساتۋ ءۇشىن جەكە مەديتسينالىق ورتالىققا جۇگىنگەن. وپەراتسيا 4 ءساۋىر كۇنى جاسالعان. الايدا كوپ ۇزاماي ونىڭ جاعدايى كۇرت ناشارلاپ، كوماعا تۇسكەن. ءبىر ايدان كەيىن، 5 مامىردا كوز جۇمعان.
مارقۇمنىڭ جۇبايى دارىگەرلەردىڭ جىبەرگەن قاتەلىگى اۋىر جاعدايعا سەبەپ بولعانىن ايتادى. ونىڭ سوزىنشە، ينتۋباتسيا دۇرىس جاسالماي، سالدارىنان ەربول ايتۋوۆتىڭ قان قىسىمى مەن قانداعى قانت دەڭگەيى كۇرت كوتەرىلگەن. كەيىن ول يشەميالىق ينسۋلت الىپ، ەس-ءتۇسسىز جاتقان.
تۋىستارى كلينيكا ناۋقاسقا قاجەتتى كومەكتى دەر كەزىندە كورسەتپەدى ءارى ونىڭ ناقتى جاعدايىن جاسىردى دەپ مالىمدەۋدە.
وقيعادان كەيىن دەنساۋلىق ساقتاۋ مينيسترلىگى كلينيكاعا ارنايى تەكسەرۋ جۇرگىزدى. تەكسەرۋ بارىسىندا مەديتسينالىق مەكەمەدە بىرقاتار ورەسكەل زاڭبۇزۋشىلىق انىقتالعان. اتاپ ايتقاندا، وپەراتسيالىق ءبولىم تولىق جابدىقتالماعان، كەيبىر مەديتسينالىق قۇرىلعىلاردىڭ پايدالانۋ مەرزىمى ءوتىپ كەتكەن. سونىمەن قاتار انافيلاكتيكالىق شوك كەزىندە قولدانىلاتىن قاجەتتى دارىلەردىڭ بولماعانى بەلگىلى بولدى.
ەڭ باستىسى — كلينيكادا ەرەسەكتەرگە ارنالعان انەستەزيولوگيا جانە رەانيماتسيا قىزمەتىن كورسەتۋگە ليتسەنزيا بولماعان. سونداي-اق دارىگەرلەر ناۋقاستى تولىق مەديتسينالىق تەكسەرۋدەن وتكىزبەي، قاجەتتى اناليزدەرسىز وپەراتسياعا جىبەرگەنى انىقتالعان.
قازىرگى تاڭدا تەكسەرۋ ماتەريالدارى پروكۋراتۋراعا جولدانعان. الايدا ماڭعىستاۋ وبلىستىق پروكۋراتۋراسى ماتەريالداردىڭ ازىرگە تۇسپەگەنىن حابارلادى.
رەسمي مالىمەت بويىنشا، ەربول ايتۋوۆ ماڭعىستاۋ وبلىستىق ءماسليحاتىنىڭ دەپۋتاتى ءارى “Kazpetrodrilling” اكتسيونەرلىك قوعامىنىڭ وڭىرلىك ۆيتسە-پرەزيدەنتى بولعان. ول 1977 جىلدىڭ 21 ناۋرىزىندا دۇنيەگە كەلگەن.
ايتا كەتەيىك، بۇعان دەيىن الماتىداعى جەكە كلينيكادا ليپوساكتسيا جاساتقان بلوگەر ساۋلە بازارحاننىڭ دا وپەراتسيادان كەيىن قايتىس بولعانى تۋرالى اقپارات تاراعان ەدى. بۇل جاعدايلار پلاستيكالىق حيرۋرگيا سالاسىنداعى قاۋىپسىزدىك ماسەلەسىن قايتادان كۇن تارتىبىنە شىعاردى.
