جەتىسۋ وبلىسىندا ءۇش ەكوپارك اشۋ جوسپارلانعان. سونىڭ ءبىرى تەكەلى قالاسىندا قۇرىلادى. وسىعان بايلانىستى وبلىس اكىمى بەيبىت يساباەۆ قالا اكىمىنە جالپى اۋماعى 21 گەكتاردى قۇرايتىن «سەركەساي» ەكوپاركىن قۇرۋ جۇمىستارىن اعىمداعى جىلى باستاۋدى تاپسىردى. بۇل تۋرالى وبلىس اكىمى بەيبىت يساباەۆتىڭ تەكەلى قالاسىنىڭ تۇرعىندارىمەن كەزدەسۋىندە ايتىلدى.
"تەكەلى قالاسىنىڭ تابيعي-رەكرەاتسيالىق الەۋەتى ءتۋريزمدى دامىتۋعا زور مۇمكىندىك بەرەدى. پرەزيدەنت تاپسىرمالارىن ورىنداۋ اياسىندا ءبىز تاراپىمىزدان بارلىق قاجەتتى قولداۋ كورسەتىلۋدە. اتاپ ايتقاندا، دەربەس تۋريزم ءبولىمى اشىلدى. ەندى وسى باعىتتا ناقتى شارالار قابىلدانۋى ءتيىس. زاماناۋي تالاپتارعا ساي جاڭا قوناق ۇيلەر مەن دەمالىس ورىندارىن سالۋ كەرەك. سونىمەن قاتار ەكولوگيالىق ءتۋريزمدى دامىتۋ اياسىندا «سەركەساي» ەكوپاركىن قۇرۋدىڭ جوبالىق-سمەتالىق قۇجاتتاماسىن جانە وزگە دە قاجەتتى قۇجاتتاردى ازىرلەپ، بيىل باستاۋ كەرەك. جالپى، تۋريستىك باعىتتى جانداندىرۋ ارقىلى قالا ەكونوميكاسىنىڭ ءوسىمىن قامتاماسىز ەتۋدى تاپسىرامىن", – دەگەن ب. يساباەۆ تەكەلى قالاسىنىڭ اكىمى ا. ادىلگە تۋريزم سالاسىن دامىتۋ ماسەلەسىن جەكە باقىلاۋىنا الۋدى مىندەتتەدى.
بەلگىلى بولعانداي، الدىن الا جوسپار بويىنشا ەكوپاركتە فوتوايماق، سەرۋەندەۋ ايماعى جاسالادى، ورىندىقتار، باعىتتاۋ بەلگىلەرى، سانيتارلىق توراپتار قويىلادى جانە باسقا دا اباتتاندىرۋ جۇمىستارى اتقارىلادى. بۇل رەتتە وبلىس اكىمى پاركتى اباتتاندىرۋدا بىرىڭعاي ءستيلدىڭ ساقتالۋىنا نازار اۋدارۋ قاجەتتىگىن ايتتى.
اتاپ وتسەك، بۇگىندە تەكەلى قالاسىندا 22 تۋريستىك نىسان جۇمىس ىستەيدى. وتكەن جىلى ىشكى تۋريزم اياسىندا 19,8 مىڭ كەلۋشىگە جالپى سوماسى 570 ملن تەڭگەنىڭ تۋريستىك قىزمەتتەرى كورسەتىلدى. ال بيىل قالاعا شامامەن 24 مىڭ تۋريست كەلەدى دەپ كۇتىلۋدە. جەكە ينۆەستيتسيالار ەسەبىنەن بىرنەشە ءىرى جوبا جۇزەگە اسىرىلۋدا. اتاپ ايتقاندا، 50 كوتتەدجدىڭ قۇرىلىسى باستالىپ، ساق مونشالارى، ويىن-ساۋىق كەشەنى جانە بىرقاتار قوناق ۇيلەر پايدالانۋعا بەرىلدى. سونىمەن قاتار قوسىمشا جوبا اياسىندا گلەمپينگتەر مەن دەمالىس ايماقتارىن ورنالاستىرۋ كوزدەلىپ وتىر.
