فوتو: قانات ءومىرالينوۆ
رەسپۋبليكا كۇنى قارساڭىندا جەتىسۋ وبلىسىنىڭ ۇشتوبە قالاسىندا «تازا قازاقستان» باعدارلاماسى اياسىندا جاڭارعان زاماناۋي ورتالىق ساياباق پايدالانۋعا بەرىلدى. بۇل – بيىل وڭىردە جوندەۋ جۇرگىزىلىپ جاتقان 7 ساياباقتىڭ ءبىرى.
ساياباقتىڭ اشىلۋ سالتاناتىنا اۋدان اكىمى ۇلان دوسىمبەكوۆ، ارداگەرلەر، جاستار وكىلدەرى، اۋدان تۇرعىندارى – جالپى سانى 1,5 مىڭ ادام جينالدى. الدىمەن اۋدان اكىمى كوپشىلىككە ءوڭىر باسشىسى بەيبىت يساباەۆتىڭ قۇتتىقتاۋ حاتىن وقىپ بەردى. «بۇگىن مەملەكەت باسشىسىنىڭ ەلدى مەكەندەردى كوركەيتۋگە، اباتتاندىرىپ، كوگالداندىرۋعا ۇلكەن سەرپىن بەرىپ وتىرعان «تازا قازاقستان» باعدارلاماسى اياسىندا تۇبەگەيلى جاڭارعان جاڭا ساياباقتىڭ ىسكە قوسىلۋىنا كۋا بولىپ وتىرسىزدار. مۇندا امفيتەاتردان باستاپ، بالالار ويىن الاڭدارىنا دەيىنگى دەمالىسقا قاجەتتى بارلىق جاعداي جاسالعان. ەندىگى رەتتە ورتاق يگىلىككە قامقورلىق تانىتىپ، ونى كۇتىپ ۇستاۋ – اۋدان تۇرعىندارىنىڭ پارىزى. بۇگىن قولدانىسقا بەرىلىپ وتىرعان ساياباق قالاداعى ەڭ كورنەكتى دەمالىس ورىندارىنىڭ ءبىرى بولادى دەگەن سەنىمدەمىن. جەتىسۋىمىز كوركەيىپ، گۇلدەنە بەرسىن! بارشاڭىزعا ەڭبەكتە تابىس، وتباسىلارىڭىزعا باق-بەرەكە تىلەيمىن»، - دەلىنگەن قۇتتىقتاۋ حاتتا.
تۇرعىندار اتىنان ەڭبەك ارداگەرى راقىمعالي وتەگەنوۆ ءسوز الىپ، ىزگى تىلەگىن ءبىلدىردى. مۇنان سوڭ ساياباقتىڭ رەسمي اشىلعانىنىڭ سيمۆولى رەتىندە لەنتاسى قيىلدى. سونداي-اق جينالعان قاۋىم ساياباق ىشىنە 50-گە تارتا اعاش وتىرعىزدى.
اتاپ وتسەك، ۇشتوبەدەگى ورتالىق ساياباق 1936 جىلى سالىنعان. سوڭعى رەت 2015 جىلى جوندەۋدەن وتكەن دەمالىس ورنى اراعا ون جىلدان استام ۋاقىت سالىپ، بۇگىنگى زامان تالاپتارىنا ساي جاڭعىرتىلىپ، قايتادان حالىق يگىلىگىنە ۇسىنىلىپ وتىر. ونىڭ جالپى اۋماعى - 6,6 گەكتار.
اباتتاندىرىلعان ساياباقتا تۇرعىندار مەن اۋدان قوناقتارىنىڭ بوس ۋاقىتىن ءتيىمدى وتكىزۋىنە، وتباسىمەن سەرۋەندەۋىنە جانە سپورتپەن شۇعىلدانۋىنا قولايلى جاعداي جاسالعان. مۇندا سپورت الاڭدارى، بالالار ويىن الاڭقايلارى، 200 ادام سياتىن امفيتەاتر، ساۋلەتتىك ەسكەرتكىشتەر مەن سۋبۇرقاقتار ورناتىلعان. سول سياقتى ۇلتتىق مادەنيەتىمىز بەن تاريحىمىزدان حاباردار ەتەتىن «جەتى قازىنا» الاڭى بار. جىل باسىنان بەرى ساياباقتا 1 200 اعاش كوشەتى وتىرعىزىلسا، سونىڭ 750-ءى قاراعاي، 450-ءى اق قايىڭ. جاسىل جەلەكتى كۇتىپ-باپتاۋ جانە سۋ رەسۋرستارىن ءتيىمدى پايدالانۋ ماقساتىندا تامشىلاتىپ سۋارۋ جۇيەسى ورناتىلعان.
ساياباقتىڭ اشىلۋىنا كەلگەن تۇرعىندار ءوز پىكىرلەرىن ءبىلدىردى.
- ۇشتوبە قالاسىندا 1980 جىلداردان بەرى تۇرامىن. جوعارى وقۋ ورنىن بىتىرگەننەن كەيىن مەنى وسىنداعى «ۇشتوبە ورمان شارۋاشىلىعى» مەكەمەسىنە جولدامامەن جۇمىسقا جىبەردى. قازىر زەينەتكەرمىن. قالامىز جىلدان جىلعا دامىپ كەلەدى. جولدار جاسالىپ، كوشەلەر كوركەيتىلىپ، جاسىل جەلەككە ورانۋدا. اسىرەسە، وسى پاركتىڭ جاڭا كەيىپتە قولدانىسقا بەرىلگەنىنە قۋانىشتىمىز. بۇرىن بۇل پارك توزىپ تۇرعان، ۇلكەن اعاشتارى ەسكىرىپ، قۋراعان، دەمالىسقا قولايلى ەمەس ەدى. بۇگىن ورتالىق ساياباق جاڭا بەت-بەينەسىمەن حالىقتى قۋانتىپ جاتىر. قازىر جاڭارتىلعاننان كەيىن پاركتى ءتىپتى تانىماي قالدىق دەسە دە بولادى. پاركتە بەينەكامەرالار دا قويىلعان. ول مۇنداعى دۇنيە-مۇلىكتى سىندىرماي، توزدىرماي ۇستاۋعا ىقپال ەتەدى دەپ ويلايمىن. اسىرەسە اينالاعا جاستار جاناشىرلىقپەن قاراسا ەكەن دەيمىز. ەندى نەمەرەلەرىمىزبەن، قاتارلاستارىمىزبەن كەلىپ، ساياباقتا ەركىن دەمالا الامىز، - دەيدى كوپباي اكىموۆ.
- پاركتىڭ ىشىندە سپورت الاڭدارى بار. بالالاردىڭ ويىن الاڭدارى دا سالىندى. بۇل بىزگە وتە جاقسى بولدى. ەندى سپورتتىق ويىنداردى الاڭسىز ويناۋعا مۇمكۋىندىگىمىز بار، - دەيدى وقۋشى مۇرات ايبىن.
- بيىل ۇشتوبە قالاسىنا 65 جىل تولىپ وتىر. وسى ايتۋلى مەرەيتوي قارساڭىندا رەسپۋبليكا كۇنىنە وراي قالادا جاڭا ساياباقتىڭ اشىلۋى اۋدان ورتالىعىنىڭ تۇرعىندارى ءۇشىن ۇلكەن تارتۋ بولدى. جىل باسىندا وبلىس اكىمى ساياباقتى جوندەپ، كوركەيتىپ بەرەمىز دەپ ۋادە بەرگەن بولاتىن. بۇگىن، مىنە، سول ايتىلعان ۋادەنىڭ ورىندالعانىنا كۋا بولىپ وتىرمىز. ۇشتوبە قالاسى تۇرعىندارىنىڭ اتىنان وبلىس باسشىلىعىنا ريزاشىلىعىمدى بىلدىرەمىن. جەرلەستەرىمە ايتارىم، ەندى ءبىز بۇل يگىلىكتەردى بالالارىمىزعا، ۇرپاقتارىمىزعا وسى كورىكتى قالپىندا قالدىرۋىمىز كەرەك. ساياباعىمىزدى كۇتىپ ۇستايىق! – دەدى نيكيتا وپرىشكو.
اتاپ وتسەك، وبلىستا ەلدى مەكەندەردى اباتتاندىرۋ جانە تۇرعىندارعا قولايلى ورتا قالىپتاستىرۋ باعىتىندا 2022-2025 جىلدارى 40 ساياباققا جوندەۋ جۇرگىزىلسە، بيىل 7 پارك، 1 سكۆەر، 4 اللەيا جوندەۋدەن وتكىزىلۋدە. جالپى، وبلىس قۇرىلعاننان بەرى تالدىقورعان قالاسىندا، سونداي-اق اقسۋ، الاكول، ەسكەلدى، قاراتال، كەربۇلاق، كوكسۋ، پانفيلوۆ اۋداندارىندا 14 جاڭا ساياباق، 6 سكۆەر جانە 4 اللەيا سالىندى.
سونداي-اق تالدىقورعان قالاسىندا «تاسباقا»، سارقاندا «قويتاس»، تەكەلىدە «سەركەساي» ەكوپاركتەرى قۇرىلدى. ءتورتىنشى ەكوپارك رەتىندە قاپالداعى «تامشىبۇلاقتى» دامىتۋ قولعا الىنباق. ولاردى قۇرۋداعى ماقسات - جەتىسۋدا ەكولوگيالىق جانە مادەني-تانىمدىق ءتۋريزمدى دامىتۋ، سونداي-اق ءوڭىردىڭ تابيعي جانە تاريحي ەرەكشەلىكتەرىن كەڭىنەن ناسيحاتتاۋ.
