Foto: Qanat Ömırälinov
Respublika künı qarsaŋynda Jetısu oblysynyŋ Üştöbe qalasynda «Taza Qazaqstan» baǧdarlamasy aiasynda jaŋarǧan zamanaui ortalyq saiabaq paidalanuǧa berıldı. Būl – biyl öŋırde jöndeu jürgızılıp jatqan 7 saiabaqtyŋ bırı.
Saiabaqtyŋ aşylu saltanatyna audan äkımı Ūlan Dosymbekov, ardagerler, jastar ökılderı, audan tūrǧyndary – jalpy sany 1,5 myŋ adam jinaldy. Aldymen audan äkımı köpşılıkke öŋır basşysy Beibıt İsabaevtyŋ qūttyqtau hatyn oqyp berdı. «Bügın Memleket basşysynyŋ eldı mekenderdı körkeituge, abattandyryp, kögaldandyruǧa ülken serpın berıp otyrǧan «Taza Qazaqstan» baǧdarlamasy aiasynda tübegeilı jaŋarǧan jaŋa saiabaqtyŋ ıske qosyluyna kuä bolyp otyrsyzdar. Mūnda amfiteatrdan bastap, balalar oiyn alaŋdaryna deiıngı demalysqa qajettı barlyq jaǧdai jasalǧan. Endıgı rette ortaq igılıkke qamqorlyq tanytyp, ony kütıp ūstau – audan tūrǧyndarynyŋ paryzy. Bügın qoldanysqa berılıp otyrǧan saiabaq qaladaǧy eŋ körnektı demalys oryndarynyŋ bırı bolady degen senımdemın. Jetısuymyz körkeiıp, güldene bersın! Barşaŋyzǧa eŋbekte tabys, otbasylaryŋyzǧa baq-bereke tıleimın», - delıngen qūttyqtau hatta.
Tūrǧyndar atynan eŋbek ardagerı Raqymǧali Ötegenov söz alyp, ızgı tılegın bıldırdı. Mūnan soŋ saiabaqtyŋ resmi aşylǧanynyŋ simvoly retınde lentasy qiyldy. Sondai-aq jinalǧan qauym saiabaq ışıne 50-ge tarta aǧaş otyrǧyzdy.
Atap ötsek, Üştöbedegı ortalyq saiabaq 1936 jyly salynǧan. Soŋǧy ret 2015 jyly jöndeuden ötken demalys orny araǧa on jyldan astam uaqyt salyp, bügıngı zaman talaptaryna sai jaŋǧyrtylyp, qaitadan halyq igılıgıne ūsynylyp otyr. Onyŋ jalpy aumaǧy - 6,6 gektar.
Abattandyrylǧan saiabaqta tūrǧyndar men audan qonaqtarynyŋ bos uaqytyn tiımdı ötkızuıne, otbasymen seruendeuıne jäne sportpen şūǧyldanuyna qolaily jaǧdai jasalǧan. Mūnda sport alaŋdary, balalar oiyn alaŋqailary, 200 adam siiatyn amfiteatr, säulettık eskertkışter men subūrqaqtar ornatylǧan. Sol siiaqty ūlttyq mädenietımız ben tarihymyzdan habardar etetın «Jetı qazyna» alaŋy bar. Jyl basynan berı saiabaqta 1 200 aǧaş köşetı otyrǧyzylsa, sonyŋ 750-ı qaraǧai, 450-ı aq qaiyŋ. Jasyl jelektı kütıp-baptau jäne su resurstaryn tiımdı paidalanu maqsatynda tamşylatyp suaru jüiesı ornatylǧan.
Saiabaqtyŋ aşyluyna kelgen tūrǧyndar öz pıkırlerın bıldırdı.
- Üştöbe qalasynda 1980 jyldardan berı tūramyn. Joǧary oqu ornyn bıtırgennen keiın menı osyndaǧy «Üştöbe orman şaruaşylyǧy» mekemesıne joldamamen jūmysqa jıberdı. Qazır zeinetkermın. Qalamyz jyldan jylǧa damyp keledı. Joldar jasalyp, köşeler körkeitılıp, jasyl jelekke oranuda. Äsırese, osy parktıŋ jaŋa keiıpte qoldanysqa berılgenıne quanyştymyz. Būryn būl park tozyp tūrǧan, ülken aǧaştary eskırıp, quraǧan, demalysqa qolaily emes edı. Bügın ortalyq saiabaq jaŋa bet-beinesımen halyqty quantyp jatyr. Qazır jaŋartylǧannan keiın parktı tıptı tanymai qaldyq dese de bolady. Parkte beinekameralar da qoiylǧan. Ol mūndaǧy dünie-mülıktı syndyrmai, tozdyrmai ūstauǧa yqpal etedı dep oilaimyn. Äsırese ainalaǧa jastar janaşyrlyqpen qarasa eken deimız. Endı nemerelerımızben, qatarlastarymyzben kelıp, saiabaqta erkın demala alamyz, - deidı Köpbai Äkımov.
- Parktıŋ ışınde sport alaŋdary bar. Balalardyŋ oiyn alaŋdary da salyndy. Būl bızge öte jaqsy boldy. Endı sporttyq oiyndardy alaŋsyz oinauǧa mümkuındıgımız bar, - deidı oquşy Mūrat Aibyn.
- Biyl Üştöbe qalasyna 65 jyl tolyp otyr. Osy aituly mereitoi qarsaŋynda Respublika künıne orai qalada jaŋa saiabaqtyŋ aşyluy audan ortalyǧynyŋ tūrǧyndary üşın ülken tartu boldy. Jyl basynda oblys äkımı saiabaqty jöndep, körkeitıp beremız dep uäde bergen bolatyn. Bügın, mıne, sol aitylǧan uädenıŋ oryndalǧanyna kuä bolyp otyrmyz. Üştöbe qalasy tūrǧyndarynyŋ atynan oblys basşylyǧyna rizaşylyǧymdy bıldıremın. Jerlesterıme aitarym, endı bız būl igılıkterdı balalarymyzǧa, ūrpaqtarymyzǧa osy körıktı qalpynda qaldyruymyz kerek. Saiabaǧymyzdy kütıp ūstaiyq! – dedı Nikita Opryşko.
Atap ötsek, oblysta eldı mekenderdı abattandyru jäne tūrǧyndarǧa qolaily orta qalyptastyru baǧytynda 2022-2025 jyldary 40 saiabaqqa jöndeu jürgızılse, biyl 7 park, 1 skver, 4 alleia jöndeuden ötkızılude. Jalpy, oblys qūrylǧannan berı Taldyqorǧan qalasynda, sondai-aq Aqsu, Alaköl, Eskeldı, Qaratal, Kerbūlaq, Köksu, Panfilov audandarynda 14 jaŋa saiabaq, 6 skver jäne 4 alleia salyndy.
Sondai-aq Taldyqorǧan qalasynda «Tasbaqa», Sarqanda «Qoitas», Tekelıde «Serkesai» ekoparkterı qūryldy. Törtınşı ekopark retınde Qapaldaǧy «Tamşybūlaqty» damytu qolǧa alynbaq. Olardy qūrudaǧy maqsat - Jetısuda ekologiialyq jäne mädeni-tanymdyq turizmdı damytu, sondai-aq öŋırdıŋ tabiǧi jäne tarihi erekşelıkterın keŋınen nasihattau.
