تاجىكستان بيلىگى تاجىك ەسىمدەرىنىڭ جاڭارتىلعان ءتىزىلىمىن بەكىتتى، دەپ حابارلايدى “ادىرنا” ۇلتتىق پورتالى فەرعانا اقپاراتتىق رەسۋرسىنا سىلتەپ.
تىزىمنەن اميرا، اليا جانە جاسمين سەكىلدى كەڭ تارالعان اراب جانە باتىس ۇلگىسىندەگى ەسىمدەر الىنىپ تاستالدى. ال ولاردىڭ ورنىنا ارعاۆون، گۇلدۋحت، يوسۋمان سياقتى تاجىك جانە پارسى مادەنيەتىنە ءتان ەسىمدەر ەنگىزىلدى.
باق-تىڭ حابارلاۋىنشا، جاڭارتىلعان تىزىمگە ەجەلگى اڭىزدارداعى كەيىپكەردىڭ اتى سانالاتىن ۆيس، سونداي-اق گاۆحارون، گەتي جانە پارسى-تاجىك ادەبي مۇراسىمەن بايلانىستى باسقا دا ەسىمدەر ەنگەن.
بۇل وزگەرىس تاجىكستاننىڭ ۇلتتىق قۇندىلىقتاردى جاڭعىرتۋعا باعىتتالعان ۇزاقمەرزىمدى ساياساتىنىڭ جالعاسى سانالادى. ۇلتتىق ەسىمدەر ءتىزىمى العاش رەت 2016–2017 جىلدارى مادەنيەت مينيسترلىگى مەن ۇكىمەت جانىنداعى ءتىل جانە تەرمينولوگيا كوميتەتىنىڭ باستاماسىمەن جارىق كورگەن. ول كەزدە قۇجاتقا 3000-نان استام ەسىم ەنگىزىلگەن بولاتىن.
تاجىكستاندا ازاماتتىق حال اكتىلەرىن تىركەۋ ورگاندارى اتا-انالار تاڭداعان ەسىم رەەستردە بولماسا، ونى تىركەۋدەن باس تارتا الادى. بيلىك مۇنداي شەكتەۋلەر ۇلتتىق داستۇرلەر مەن تاريحي-مادەني قۇندىلىقتاردى ساقتاۋ ماقساتىندا ەنگىزىلگەنىن مالىمدەدى.
سونىمەن قاتار، ەلدە ازاماتتارعا فاميليالار مەن اكە اتتارىنداعى ورىس تىلىنەن ەنگەن «-وۆ»، «-وۆا»، «-ۆيچ»، «-وۆنا» جالعاۋلارىن ۇلتتىق «-زود»، «-زودا»، «-پۋر»، «-يون»، «-فار» نۇسقالارىمەن الماستىرۋ ۇسىنىلىپ وتىر.
ورتالىق ازيا ەلدەرىنىڭ اراسىندا تاجىكستان باسشىسى العاشقى بولىپ تەگىندەگى ورىسشا جالعاۋدان باس تارتقانى بەلگىلى. 2007 جىلى تاجىكستان پرەزيدەنتى ەمومالي راحمون ءوز تەگىندەگى «-وۆ» جالع اۋىن الىپ تاستاپ، ۇلتتىق نۇسقاعا كوشتى. ول بۇل قادامىن تاجىك مادەنيەتىن جاڭعىرتۋعا باعىتتالعان باستامانىڭ ءبىر بولىگى رەتىندە ءتۇسىندىردى جانە حالىقتى دا ۇلتتىق داستۇرگە ساي ەسىمدەردى قولدانۋعا شاقىردى. ورتالىق ازياداعى بارلىق باسشىلار مۇنداي شەشىم قابىلداعان جوق. مىسالى، قازاقستاننىڭ ەكس-پرەزيدەنتى نۇرسۇلتان نازارباەۆ بيلىكتە بولعان كەزدە بەرگەن سۇحباتتارىنىڭ بىرىندە مۇنى حالىقارالىق قۇجاتتار، كەلىسىمدەرگە «نازارباەۆ» نۇسقاسىندا قول قويىپ كەلگەندىكتەن، ورتا جولدا تەگىن وزگەرتە المايتىنىن ايتقان. بىراق نازارباەۆ 1996 جىلعى 2 اقپاندا «ۇلتى قازاق ازاماتتاردىڭ تەگi مەن اكەسiنiڭ اتىن جازۋعا بايلانىستى ماسەلەلەردi شەشۋ ءتارتiبi تۋرالى» ارنايى جارلىقق قول قويعان. وسى جارلىققا سايكەس، قازاق ۇلتىنىڭ وكىلدەرى تەگىندەگى قازاق تىلىنە ءتان ەمەس جالعاۋلاردى الىپ تاستاۋعا نەمەسە قازاقى نۇسقاعا وزگەرتۋگە قۇقىلى.
