"پارا الۋشى دا، بەرۋشى دە ۇيىندە جاتىر. بۇل ىستە تۇك كىناسى جوق ب.حامەنوۆا نەگە وزىنە سەنىمدى بولماۋى كەرەك، نەگە ادىلدىككە سەنبەۋى كەرەك". قاماۋدا وتىرعان اتىراۋ وبلىسى اكىمىنىڭ ورىنباسارى باقىتگۇل حامەنوۆانىڭ فەيسبۋك پاراقشاسىندا وسىنداي جازبا جاريالاندى، دەپ جازادى "ادىرنا" ۇلتتىق پورتالى.
"جەلىدەگى جازبالاردى جارىسا ءبولىسىپ، ايىزى قانعانشا سىباپ، “سوتتالسىن!” دەپ جاتقاندار دا جەتەرلىك. پىكىرلەرگە كوزىڭ ءتۇسىپ كەتسە، جاعاڭدى ۇستايتىنداي جاعداي. اق جاۋلىقتى انا جاسىنداعى اپالار، ەر دەپ سەنىم ارتار ازاماتتار دا اۋىزدارىنان اق يت كىرىپ، كوك يت شىعىپ، قارعاپ-سىلەپ، تابالاۋدان ايانىپ قالماعان ەكەن... ءجا، نالىمادىق اسا، انامىز ايتقانداي، ورەسى تومەن كەيبىرەۋلەردىڭ كوپ ءسوزى مەن بوق ءسوزى تاعدىردى شەشپەيدى. اللاعا شۇكىر، باۋىرىمىزدىڭ ادالدىعىنا سەنىپ، قولداۋ كورسەتىپ سوتقا كەلگەن، الەۋمجەلىدە جىلى سوزىمەن جىلاتىپ تا، جۇباتىپ تا جاتقان تىلەۋلەس اعايىننىڭ قاراسى قالىڭ. پارا الۋشى دا، پارانى بەرۋشى دە بوستاندىقتا ۇيىندە جاتقاندا، 8 اي بويى سيزو-دا سوتتى كۇتىپ جاتقان ب.حامەنوۆانىڭ “ادىلدىك جەڭەدى!” دەگەن ءبىر اۋىز ءسوزىن سان-ساققا جۇگىرتىپ، بولجام جاتقان دا ءوز قازاعىمىز. تۇسىنبەيتىنىمىز - بۇل ىستە تۇك كىناسى جوق ب.حامەنوۆا نەگە وزىنە سەنىمدى بولماۋى كەرەك، نەگە ادىلدىككە سەنبەۋى كەرەك؟!", - دەلىنگەن جازبادا.
ەستەرىڭىزگە سالا كەتەيىك، باقىتگۇل حامەنوۆانىڭ سوتى 11 تامىزدا وتەدى.
"ادىرنا" ۇلتتىق پورتالى
