ەلىمىزدىڭ بىرقاتار وڭىرىندە اسكەري تەحنيكانىڭ قوزعالىسى ارتۋى مۇمكىن. بۇل تۋرالى قورعانىس مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
رەسمي دەرەكتەرگە سۇيەنسەك، 29 ماۋسىم مەن 2 شىلدە ارالىعىندا قارۋلى كۇشتەردىڭ اسكەري بولىمدەرى مەن مەكەمەلەرىندە اسكەرلەردى جاۋىنگەرلىك ازىرلىكتىڭ جوعارى دارەجەلەرىنە كەلتىرۋ بويىنشا كەشەندى تاكتيكالىق-ساپتىق ساباقتار وتكىزىلمەك.
ءىس-شارالار جەكە قۇرام مەن بولىمشەلەردىڭ اسكەرلەردى جاۋىنگەرلىك ازىرلىكتىڭ جوعارى دارەجەلەرىنە كەلتىرۋ كەزىندەگى پراكتيكالىق داعدىلارىن جەتىلدىرۋگە باعىتتالعان.
مينيسترلىك مالىمەتىنشە، وتكىزىلەتىن ءىس-شارالار جوسپارلى وقۋ سيپاتىندا بولادى جانە نەگىزىنەن اسكەري بولىمدەردىڭ اۋماقتارىندا جانە وقۋ پوليگوندارىندا ۇيىمداستىرىلادى. وسىعان بايلانىستى اسكەري تەحنيكانىڭ قوزعالىسى بايقالۋى مۇمكىن.
«جەكەلەگەن بولىمشەلەر وقۋ پوليگوندارى مەن وقۋ ورتالىقتارىنا جوسپارلى مارشتار جاسايدى. وسى كەزەڭدە وڭىرلەردەگى جەكەلەگەن اۆتوجول ۋچاسكەلەرىندە جول قوزعالىسىنا ۋاقىتشا شەكتەۋلەر ەنگىزىلۋى مۇمكىن. وسىعان بايلانىستى قورعانىس مينيسترلىگى ازاماتتاردى، الەۋمەتتىك جەلىلەردى پايدالانۋشىلاردى جانە بۇقارالىق اقپارات قۇرالدارىنىڭ وكىلدەرىن تەك رەسمي اقپارات كوزدەرىندە جاريالانعان مالىمەتتەردى باسشىلىققا الۋعا شاقىرادى»،–دەلىنگەن حابارلامادا.
