Elımızdıŋ bırqatar öŋırınde äskeri tehnikanyŋ qozǧalysy artuy mümkın. Būl turaly Qorǧanys ministrlıgınıŋ baspasöz qyzmetı aitty, dep habarlaidy «Adyrna» tılşısı.
Resmi derekterge süiensek, 29 mausym men 2 şılde aralyǧynda Qaruly Küşterdıŋ äskeri bölımderı men mekemelerınde äskerlerdı jauyngerlık äzırlıktıŋ joǧary därejelerıne keltıru boiynşa keşendı taktikalyq-saptyq sabaqtar ötkızılmek.
Is-şaralar jeke qūram men bölımşelerdıŋ äskerlerdı jauyngerlık äzırlıktıŋ joǧary därejelerıne keltıru kezındegı praktikalyq daǧdylaryn jetıldıruge baǧyttalǧan.
Ministrlık mälımetınşe, ötkızıletın ıs-şaralar josparly oqu sipatynda bolady jäne negızınen äskeri bölımderdıŋ aumaqtarynda jäne oqu poligondarynda ūiymdastyrylady. Osyǧan bailanysty äskeri tehnikanyŋ qozǧalysy baiqaluy mümkın.
«Jekelegen bölımşeler oqu poligondary men oqu ortalyqtaryna josparly marştar jasaidy. Osy kezeŋde öŋırlerdegı jekelegen avtojol uchaskelerınde jol qozǧalysyna uaqytşa şekteuler engızıluı mümkın. Osyǧan bailanysty Qorǧanys ministrlıgı azamattardy, äleumettık jelılerdı paidalanuşylardy jäne būqaralyq aqparat qūraldarynyŋ ökılderın tek resmi aqparat közderınde jariialanǧan mälımetterdı basşylyqqa aluǧa şaqyrady»,–delıngen habarlamada.
