قاراعاندى وبلىسىندا سوت ءمايىتتى ەكسگۋماتسيالاۋعا دەيىن جەتكەن جەرلەۋ ورنىنا قاتىستى وتباسىلىق داۋدى قارادى، دەپ حابارلايدى «ادىرنا» ءتىلشىسى.
تالاپ قويۋشىنىڭ ايتۋىنشا، اناسى 2024 جىلعى قاراشا ايىندا قايتىس بولعاننان كەيىن ونى «قۇرىلىس» زيراتىنا جەرلەگەن. كەيىننەن بولجامدى جەرلەۋ ورنىنا ىرگەتاس، قورشاۋ جانە باسقا قايتىس بولعان ادامنىڭ دەرەكتەرى جازىلعان قۇلپىتاس ورناتىلعانى انىقتالعان. تالاپ قويۋشىنىڭ مالىمدەۋىنشە، اتالعان قۇرىلىستاردى جاۋاپكەر ورناتقان جانە ولاردى ءوز ەركىمەن بۇزۋدان باس تارتقان.
وسىعان بايلانىستى تالاپ قويۋشى سوتتان جاۋاپكەردى قورشاۋ مەن قۇلپىتاس تاقتاسىن بۇزۋعا مىندەتتەۋدى، سونداي-اق سوت شىعىندارىن ءوندىرىپ بەرۋدى سۇراعان.
جاۋاپكەر تالاپ ارىزدى مويىنداماي، داۋلى جەرلەۋ ورنى ءوزىنىڭ اپكەسىنە تيەسىلى ەكەنىن كورسەتكەن.
سوت-ساراپتامالىق مولەكۋلالىق-گەنەتيكالىق زەرتتەۋ بويىنشا ساراپشىنىڭ قورىتىندىسىنا سايكەس، جاۋاپكەر مەن سۇيەك ۇلگىسى زەرتتەۋگە ۇسىنىلعان جەرلەنگەن ايەلدىڭ اراسىندا بيولوگيالىق تۋىستىق بارى راستالعان. الىنعان گەنەتيكالىق دەرەكتەر نەگىزىندە اتالعان ايەلدىڭ تالاپ قويۋشىمەن بيولوگيالىق تۋىستىعى جوق ەكەندىگى انىقتالعان.
تاراپتار ۇسىنعان دالەلدەمەلەردى زەرتتەي وتىرىپ، سوت تالاپ ارىزدى قاناعاتتاندىرۋعا نەگىز جوق دەگەن قورىتىندىعا كەلدى. قازاقستان رەسپۋبليكاسى ازاماتتىق پروتسەستىك كودەكسىنىڭ 72-بابى تالاپتارىن بۇزا وتىرىپ، تالاپكەر ءوز اناسىنىڭ ءدال وسى داۋلى زيرات ۋچاسكەسىنە جەرلەنگەنىن ناقتى راستايتىن جارامدى ءارى سەنىمدى دالەلدەمەلەردى ۇسىنباعان.
«وسىعان بايلانىستى سوت شەشىمىمەن تالاپ ارىزدى قاناعاتتاندىرۋدان باس تارتىلدى. سونىمەن قاتار ءىستى قاراۋ بارىسىندا سوت بۇقار-جىراۋ اۋدانى ۇشتوبە اۋىلدىق وكرۋگى اكىمىنىڭ اپپاراتى قىزمەتىندە جەرلەۋ قاعيدالارىنىڭ ساقتالۋىن جانە جەرلەۋ ورىندارىن كۇتىپ-ۇستاۋدى ۇيىمداستىرۋدى باقىلاۋدىڭ تيىسىنشە جۇرگىزىلمەگەنى تۇرىندەگى زاڭ بۇزۋشىلىقتاردى انىقتادى. وسىعان بايلانىستى سوت انىقتالعان زاڭ بۇزۋشىلىقتاردى جويۋ جانە ولاردىڭ الداعى ۋاقىتتا قايتالانۋىنا جول بەرمەۋ جونىندە شارالار قابىلداۋ ءۇشىن ۋاكىلەتتى ورگاننىڭ اتىنا جەكە ۇيعارىم شىعاردى»،– دەلىنگەن حابارلامادا.
اپەللياتسيالىق سوت القاسى ءبىرىنشى ساتىداعى سوتتىڭ شەشىمىن وزگەرىسسىز قالدىرىپ، تالاپ قويۋشىنىڭ شاعىمىن قاناعاتتاندىرۋسىز قالدىردى.
