ءبىر كەزدە "نۇرسۇلتان" اتالعان ەل استاناسىنداعى قازاقستاننىڭ باس مەشىتىنە ءدىني باسقارما «نۇرسۇلتان مەشىتى» اتاۋىن بەردى, دەپ حابارلايدى «ادىرنا» ءتىلشىسى.
«قازاقستان مۇسىلماندارى ءدىني باسقارماسى باس رەسپۋبليكالىق مەشىتكە «نۇرسۇلتان مەشىتى» اتاۋى بەرىلگەنىن حابارلايدى. وسىعان بايلانىستى جاڭا اتاۋ رەسمي تۇردە قولدانىسقا ەنگىزىلەدى»، – دەلىنگەن حابارلامادا.
باسقارما وكىلدەرىنىڭ مالىمەتىنشە، باس رەسپۋبليكالىق مەشىت جاڭا اتاۋمەن دە حالىقتىڭ رۋحاني ومىرىنە قىزمەت ەتۋدى جالعاستىرادى. سونداي-اق قوعامداعى ءوزارا قۇرمەت پەن ىنتىماقتاستىقتى نىعايتۋعا، ءداستۇرلى رۋحاني قۇندىلىقتاردى ساقتاۋعا جانە يگى باستامالاردى دامىتۋعا ءوز ۇلەسىن قوسا بەرمەك.
«مەشىت حالىق بىرلىگىن نىعايتۋعا، بەيبىتشىلىك پەن كەلىسىمدى ىلگەرىلەتۋگە، ىزگىلىك پەن مەيىرىمدىلىك قۇندىلىقتارىن تاراتۋعا، سونداي-اق يمان مەن ادامگەرشىلىككە نەگىزدەلگەن يگى باستامالاردى قولداۋعا قىزمەت ەتەدى. جاڭا اتاۋمەن باس رەسپۋبليكالىق مەشىت حالىقتىڭ رۋحاني ومىرىنە قىزمەت ەتۋدى جالعاستىرىپ، قوعامداعى ءوزارا قۇرمەت پەن ىنتىماقتى نىعايتۋعا، ءداستۇرلى رۋحاني قۇندىلىقتاردى ساقتاۋعا جانە ىزگى باستامالاردى دامىتۋعا ۇلەس قوسا بەرەدى»، – دەپ مالىمدەدى قمدب.
بۇعان دەيىن 2012 جىلى استانادا اشىلعان مەشىتكە سول كەزدەگى پرەزيدەنتتىڭ ۇسىنىسىمەن "حازىرەت سۇلتان" اتاۋى بەرىلگەن بولاتىن.
ايتا كەتەيىك، 6 شىلدە – قازاقستاننىڭ ەكس-پرەزيدەنتى نۇرسۇلتان نازارباەۆتىڭ تۋعان كۇنى. بيىل ەكس-باسشى 86 جاسقا تولادى. ول 1989 جىلى بيلىككە كەلىپ، 30 جىلعا جۋىق ەل پرەزيدەنتى بولعان ەدى. نازارباەۆ 2022 جىلدىڭ 5 قاڭتارىنا دەيىن قاۋىپسىزدىك كەڭەسى توراعاسى بولىپ وتىردى، 2023 جىلدىڭ قازانىنا دەيىن ەلباسى ستاتۋسى ساقتالدى. ول 2019 جىلى پرەزيدەنتتىكتەن كەتەردە استانا قالاسى "نۇرسۇلتان" اتالعان جانە وبلىس ورتالىقتارىنداعى ورتالىق كوشەلەردىڭ اتى نازارباەۆتىڭ اتىنا بەرىلگەن. الايدا 2022 جىلعى قاڭتار وقيعاسىنان كەيىن ەل استاناسى قايتادان بۇرىنعى اتاۋىن يەلەنگەن. الايدا وبلىس ورتالىقتارىنداعى كوشە اتاۋلارى جانە نازارباەۆ اتىنداعى ۋنيۆەرسيتەت جانە مەكتەپ اتاۋلارى قالا بەرگەن. ول بيلىكتەن كەتكەن سوڭ كوپشىلىك ورتاسىنا كوپ شىققان جوق. تەك بىرنەشە مارتە قازىر اتى بەرىلگەن مەشىتتە بولعان جانە سايلاۋلار مەن رەفەرەندۋمدار كەزىندە عانا كوپ الدىندا كورىنگەنى بەلگىلى. ءىنىسى بولات نازارباەۆ قايتىس بولعاندا بىرەر مارتە كوپ الدىنا شىققانى بولماسا، نازارباەۆتىڭ بيلىكتەن كەتكەننەن كەيىنگى ءومىرى قوعام ءۇشىن جۇمباق. بەرتىندە نازارباەۆتىڭ "مەنىڭ ءومىرىم" اتالاتىن مەمۋارى قازاق جانە ورىس تىلدەرىندە جارىق كورگەن.
