2023 جىلدىڭ تامىزىندا كاتالونيانىڭ جوعارعى سوتى قازاقستاننىڭ ەكس-پرەزيدەنتى نۇرسۇلتان نازارباەۆتىڭ وتباسىنا تيەسىلى يسپانياداعى Can Juncadella ۆيللاسى ماڭىنداعى جاياۋ جۇرگىنشىلەر جولىن كوپشىلىككە اشۋعا مىندەتتەدى، دەپ حابارلايدى "ادىرنا" ۇلتتىق پورتالى.
بۇل ۆيللا — جەرورتا تەڭىزى جاعالاۋىنداعى لورەت-دە-مار قالاسىنىڭ ماڭىندا ورنالاسقان ءزاۋلىم ءۇي. ول نازارباەۆتىڭ قىزى — دينارا قۇلىباەۆانىڭ يەلىگىندە.
2007 جىلدان بەرى جەرگىلىكتى تۇرعىندار مەن تۋريستەر كوستا-براۆا بويىنداعى تاريحي كامي-دە-روندا جاياۋ جولىمەن ەركىن جۇرە الماي كەلگەن. سەبەبى، ۆيللا اۋماعىنان وتەتىن جول ۋچاسكەسىن كۇزەتۋشىلەر جاۋىپ تاستاعان. قارۋ ۇستاعان، كامۋفلياج كيگەن كۇزەتشى سپورتشىلاردى كەرى قايتارىپ، بۇل اۋماقتىڭ جەكە مەنشىك ەكەنىن ايتقان جاعدايلار تىركەلگەن.
ۆيللانىڭ ءوزى — 3200 شارشى مەترلىك، ىشكى قۇرىلىمىندا 17 جاتىن بولمە، 25 جۋىناتىن بولمە، تۇنگى كلۋب، باسسەين، ساۋنا، كينو زالى، شاشتاراز جانە اۆتوتۇراق بار ءسان-سالتاناتتى كەشەن. اينالاسى — شامامەن 20 گەكتار ورماندى القاپ.
جەرگىلىكتى ەكولوگيالىق ۇيىمدار مەن تۇرعىندار 15 جىل بويى زاڭسىز قۇرىلىس پەن جولدى جابۋعا قارسى كۇرەسىپ، سوتقا بىرنەشە رەت جۇگىنگەن.
بۇل جاعداي قازاقستانداعى ۇقساس ماسەلەمەن ۇندەس. 2025 جىلعى 17 شىلدەدە ءماجىلىس دەپۋتاتتارى باقىتجان بازاربەك پەن سەرگەي پونومارەۆ الماتى قالاسىنداعى المەرەك كوشەسىنىڭ كوپشىلىك جۇرەتىن بولىگى جابىلىپ قالعانىن انىقتادى. اتالعان جەر ۋچاسكەسى — 6,25 گەكتار — 2014 جىلدان باستاپ دينارا قۇلىباەۆانىڭ اتىنا تىركەلگەن. جەرگىلىكتى تۇرعىندار بۇرىن وسى جولمەن ناۆوي كوشەسىنە تىكەلەي وتەتىن بولسا، ەندى اينالما جولمەن 20 مينۋت ارتىق جۇرۋگە ءماجبۇر.
اۋماعى بيىك دۋالمەن قورشالعان، كىرۋ شەكتەلگەن. كۇزەتشىلەر بۇل جەرگە سوڭعى ءۇش جىلدا يەسىنىڭ كەلمەگەنىن ايتقان.
