موڭعوليانىڭ باستاماسىمەن بەكىتىلگەن دۇنيەجۇزىلىك جىلقى كۇنى بيىل 10–13 شىلدە ارالىعىندا ۇلتتىق «ناادام–2026» مەرەكەسى اياسىندا كەڭ كولەمدە اتالىپ وتەدى, دەپ حابارلايدى "ادىرنا".
مەرەكەلىك ءىس-شارالار كوشپەلى وركەنيەتتىڭ مادەني مۇراسىن، جىلقى شارۋاشىلىعىنىڭ ءداستۇرىن جانە ۇلتتىق قۇندىلىقتاردى دارىپتەۋگە باعىتتالعان. وسىعان بايلانىستى موڭعولياعا الەمنىڭ 50-دەن استام ەلىنەن رەسمي دەلەگاتسيالار مەن قوناقتار كەلەدى دەپ جوسپارلانىپ وتىر.
نەگىزگى ءىس-شارالار 13 شىلدەدە ۇلانباتىر قالاسىنىڭ ماڭىنداعى ءحۇي دولوون حۋداگ تاريحي-مادەني كەشەنىندە ۇيىمداستىرىلادى. باعدارلاماعا سايكەس، بۇل كۇنى دۇنيەجۇزىلىك جىلقى كۇنىنىڭ سالتاناتتى اشىلۋ ءراسىمى وتەدى.
مەرەكە اياسىندا حالىقارالىق ات جارىستارى، 10 مىڭ سالت اتتىنىڭ شەرۋى، ات ۇستىندە ساداق اتۋدان جارىستار، تسيركتىڭ ات ونەرىنە ارنالعان قويىلىمدارى، جىلقى مادەنيەتى مەن اتبەگىلىك ءداستۇرىن ناسيحاتتايتىن مادەني-سپورتتىق ءىس-شارالار، ءداستۇرلى موڭعول بايگەسى جانە ۇلتتىق كۇرەس جارىستارى ۇيىمداستىرىلادى.
ۇيىمداستىرۋشىلاردىڭ ايتۋىنشا، مەرەكەنىڭ باستى ماقساتى – جىلقىنىڭ ادامزات وركەنيەتىندەگى تاريحي ءرولىن دارىپتەپ، كوشپەلى حالىقتاردىڭ مادەني مۇراسىن حالىقارالىق دەڭگەيدە كەڭىنەن تانىستىرۋ.
