الاكول بۇگىندە قازاقستانداعى ەڭ تانىمال تۋريستىك باعىتتاردىڭ بىرىنە اينالدى.
جىل سايىن كول جاعالاۋىنا كەلەتىن دەمالۋشىلار سانى ارتىپ، ءوڭىردىڭ تۋريستىك الەۋەتى كۇشەيىپ كەلەدى. 2026 جىلى وڭىرگە رەكوردتىق 2 ميلليون تۋريست كەلەدى دەپ كۇتىلۋدە. تابيعاتىنىڭ كوركەمدىگى، ەمدىك قاسيەتى بار سۋى جانە جاڭارىپ جاتقان ينفراقۇرىلىمى الاكولدى وتاندىق تۋريستەر ءۇشىن تارتىمدى دەمالىس ورنىنا اينالدىردى.
الاكولدىڭ باستى ەرەكشەلىگىنىڭ ءبىرى – مينەرالدارعا باي سۋى مەن ەرەكشە تابيعاتى. مامانداردىڭ ايتۋىنشا، كول سۋى مەن جاعالاۋىنداعى كليمات اعزانى قالپىنا كەلتىرۋگە قولايلى. سوندىقتان مۇندا تەك دەمالىپ قانا قويماي، دەنساۋلىعىن نىعايتۋ ماقساتىندا كەلەتىندەر دە از ەمەس.
ءتۋريزمنىڭ دامۋى ءوڭىر ەكونوميكاسىنا دا وڭ اسەرىن تيگىزۋدە. جاڭا جۇمىس ورىندارى اشىلىپ، شاعىن جانە ورتا بيزنەس قارقىندى دامىپ كەلەدى. جەرگىلىكتى كاسىپكەرلەر تۋريستەرگە ارنالعان قىزمەت تۇرلەرىن كەڭەيتىپ، ۇلتتىق تاعامدار، ەكسكۋرسيالار، سۋداعى ويىن-ساۋىق پەن بەلسەندى دەمالىس باعىتتارىن ۇسىنۋدا.
سوڭعى جىلدارى الاكولگە جەتۋ دە الدەقايدا جەڭىلدەدى. تۋريستىك ماۋسىمدا تەمىرجول باعىتتارىنىڭ سانى كوبەيىپ، اۋە رەيستەرى ۇيىمداستىرىلىپ، اۆتوجولدار جاڭعىرتىلۋدا. بۇل ەلىمىزدىڭ تۇكپىر-تۇكپىرىنەن كەلەتىن دەمالۋشىلار ءۇشىن قولايلى جاعداي قالىپتاستىردى.
الاكولدىڭ دامۋى تسيفرلىق تەحنولوگيالارمەن دە تىعىز بايلانىستى.
ءوڭىردى دامىتۋدىڭ ماستەر-جوسپارى بويىنشا زاماناۋي تۋريستىك-رەكرەاتسيالىق ايماق قۇرۋ كوزدەلگەن. جوبا تاۋلىگىنە 75 مىڭ تۋريست قابىلداي الاتىن ينفراقۇرىلىم قالىپتاستىرۋدى قامتيدى.
ونىڭ ىشىندە جاعالاۋدى نىعايتۋ، كوشەلەردى اباتتاندىرۋ، كولىك جۇيەسىن جەتىلدىرۋ، تسيفرلىق سەرۆيستەردى ەنگىزۋ جانە تۇراقتى ينتەرنەتپەن قامتاماسىز ەتۋ قاراستىرىلعان.
