قازاقستان مەن يران ورمۋز بۇعازىنداعى شاحيد-رادجاي پورتىندا قازاقستاندىق كولىك-لوگيستيكالىق تەرمينال سالۋ جونىندەگى Build-Operate-Transfer – سالۋ، پايدالانۋ جانە بەرۋ (BOT) كەلىسىمىنە قول قويدى، دەپ حابارلايدى «ادىرنا» ءتىلشىسى.
كەلىسىم 27 جىل مەرزىمگە جاسالعان. ونىڭ ىشىندە 2 جىل تەرمينال قۇرىلىسىن جۇرگىزۋگە، ال كەيىنگى 25 جىل نىساندى پايدالانۋعا ارنالعان. ال جوبانىڭ ءۇشىنشى جىلىندا تەرمينالدى كوممەرتسيالىق پايدالانۋعا بەرۋ جوسپارلانعان.
«اتالعان جوبانىڭ جۇزەگە اسىرىلۋى قازاقستان مەن يران اراسىنداعى كولىك-لوگيستيكالىق ىنتىماقتاستىقتى دامىتۋداعى ماڭىزدى كەزەڭ بولماق. يراننىڭ ەڭ ءىرى پورتىندا قازاقستان تەرمينالىنىڭ قۇرىلۋى «سولتۇستىك – وڭتۇستىك» حالىقارالىق كولىك ءدالىزىنىڭ ترانزيتتىك الەۋەتىن نىعايتۋعا، لوگيستيكالىق باعىتتاردىڭ تۇراقتىلىعىن ارتتىرۋعا، سونداي-اق قازاقستاندىق ءونىمنىڭ پارسى شىعاناعى ەلدەرىنىڭ، وڭتۇستىك جانە وڭتۇستىك-شىعىس ازيانىڭ، سونداي-اق شىعىس افريكا نارىقتارىنا ءتيىمدى شىعۋىن قامتاماسىز ەتۋ ارقىلى ەكسپورت گەوگرافياسىن كەڭەيتۋگە مۇمكىندىك بەرەدى»،– دەلىنگەن ساۋدا جانە ينتەگراتسيا مينيسترلىگىنىڭ حابارلاماسىندا.
