مادەنيەت جانە اقپارات ءمينيسترى ايدا بالاەۆا كولۋمبيادا وتكەن 56-شى حالىقارالىق فيزيكا وليمپياداسىندا (IPhO) تاريحي جەتىستىككە قول جەتكىزگەن قازاقستاندىق وقۋشىلاردى قۇتتىقتادى، دەپ حابارلايدى "ادىرنا" ۇلتتىق پورتالى.
ءمينيستردىڭ ايتۋىنشا، ۇلتتىق قۇرامانىڭ بەس مۇشەسى دە التىن مەدال جەڭىپ، قازاقستان تاريحىندا تۇڭعىش رەت حالىقارالىق فيزيكا وليمپياداسىنداعى بارلىق مۇمكىن بولعان بەس التىن جۇلدەنى يەلەندى.
«بۇل جەڭىس – ەلىمىزدە ءبىلىم بەرۋ جۇيەسىن دامىتۋ، دارىندى بالالاردى قولداۋ جانە ولاردىڭ قابىلەتىن شىڭداۋعا باعىتتالعان كەشەندى جۇمىستىڭ جارقىن كورىنىسى»، – دەپ جازدى ايدا بالاەۆا الەۋمەتتىك جەلىدەگى پاراقشاسىندا.
مينيستر مەملەكەت باسشىسى قاسىم-جومارت توقاەۆتىڭ ءبىلىم مەن عىلىمدى دامىتۋعا، تالانتتى جاستاردى قولداۋعا ەرەكشە كوڭىل ءبولىپ كەلە جاتقانىن اتاپ ءوتىپ، بۇگىنگى تاريحي ناتيجە وسى باعىتتاعى جۇيەلى جۇمىستىڭ جەمىسى ەكەنىن جەتكىزدى.
بيىلعى وليمپياداعا الەمنىڭ 85 ەلىنەن 381 وقۋشى قاتىستى. قازاقستان IPhO وليمپياداسىنا 1997 جىلدان بەرى قاتىسىپ كەلەدى. وسى ۋاقىت ىشىندە العاش رەت ۇلتتىق قۇراما بارلىق بەس التىن مەدالدى تولىق يەلەندى.
التىن مەدال يەگەرلەرى – نۇرگۇل ەگەنبەرگەنوۆا، امىربەك ازاتبەكوۆ، ءىلياس قازىمبەك، رومان چەرەمنوۆ جانە دامير قۇرمان.
ايدا بالاەۆا وقۋشىلاردىڭ بۇل جەتىستىككە جەتۋ جولىندا بىرنەشە جىل بويى تىنىمسىز ەڭبەك ەتكەنىن اتاپ ءوتىپ، ولاردىڭ اتا-انالارىنا، ۇستازدارى مەن باپكەرلەرىنە العىس ءبىلدىردى. سونداي-اق قۇراما دايىندىعىنا جەتەكشىلىك ەتكەن گۇليا نۇرباقوۆاعا، سامات ماقسۇتوۆقا، الىشەر ەركەباەۆقا جانە بارلىق پەداگوگتەرگە ريزاشىلىعىن جەتكىزدى.
