ساياسي ناۋقان قارساڭىندا قوعام نازارىن اۋدارعان نەگىزگى تاقىرىپتاردىڭ ءبىرى – ۇلتتىق قۇرىلتايعا ۇسىنىلعان كانديداتتار قۇرامى مەن ونى ىرىكتەۋ ۇدەرىسىنىڭ اشىقتىعى. بيىلعى ناۋقاندا پارتيالار ءوز سەزدەرىن اشىق وتكىزىپ، كانديداتتار ءتىزىمىن الدىن الا جاريالاپ، قوعاممەن اشىق بايلانىس ورناتۋعا باسىمدىق بەرگەنى بايقالادى. بۇل ءۇردىس قوعام بەلسەندىلەرى تاراپىنان دا وڭ باعالانىپ، ساياسي جۇيەدەگى وزگەرىستەردىڭ جاڭا كەزەڭى رەتىندە سيپاتتالۋدا.
قوعام بەلسەندىسى سابيت رىسباەۆتىڭ ايتۋىنشا، سوڭعى ۋاقىتتا پارتيالاردىڭ جۇمىسىندا اشىقتىق ايقىن سەزىلەدى. ونىڭ سوزىنشە، بۇرىن قۇرىلتايعا ۇسىنىلاتىن ازاماتتاردىڭ ءتىزىمى جابىق بولىپ، جۇرتشىلىق ونى بارلىق ءراسىم اياقتالعاننان كەيىن عانا كورەتىن. ال بيىل كانديداتتار قۇرامى الدىن الا جاريالانىپ، جاڭا ەسىمدەردىڭ پايدا بولۋى قوعامنىڭ نازارىن اۋدارىپ وتىر.
وسى پىكىردى قوعام بەلسەندىسى گۇلنار قاسىم دا قولدايدى. ونىڭ ايتۋىنشا، الەۋمەتتىك جەلىلەردە، اسىرەسە Instagram پلاتفورماسىندا سايلاۋعا قاتىستى اقپاراتتىڭ ايتارلىقتاي كوبەيگەنى بايقالادى. بۇرىن بۇل ماسەلەگە اسا ءمان بەرمەگەنىن ايتقان ول، بيىل پارتيالاردىڭ سەزدەرى، كانديداتتار ءتىزىمى جانە ولاردىڭ سويلەگەن سوزدەرى اشىق جاريالانىپ جاتقانىن ەرەكشە اتاپ ءوتتى. ونىڭ پىكىرىنشە، مۇنداي جاريالىلىق ازاماتتاردىڭ ساياسي ۇدەرىستەرگە قىزىعۋشىلىعىن ارتتىرۋعا ىقپال ەتەدى.
قوعام بەلسەندىسى قالياكبار ۇسەمحانۇلى دا قازىرگى ساياسي ناۋقاننىڭ ەرەكشەلىگى رەتىندە اشىقتىق پەن جاڭارۋعا نازار اۋداردى. ونىڭ ايتۋىنشا، الەمدىك سپورت دودالارى اياقتالعاننان كەيىن ەلدەگى ساياسي دوداعا كەزەك كەلىپ، پارتيالار ءوز كانديداتتارىن جاريالاعان سوڭ قوعام ولاردى بەلسەندى تالقىلاي باستادى. ول ساياساتتاعى باسەكە دە سپورتتاعى جارىس سياقتى ەلدىڭ دامۋىنا قىزمەت ەتۋى ءتيىس ەكەنىن ايتىپ، ەڭ باستىسى – كىمنىڭ جەڭەتىنى ەمەس، حالىقتىڭ تۇرمىسىن جاقسارتاتىن ناقتى وزگەرىستەردىڭ جۇزەگە اسۋى ەكەنىن اتاپ ءوتتى.
سونىمەن قاتار قالياكبار ۇسەمحانۇلى سوڭعى جىلدارى ەلىمىزدىڭ ساياسي جۇيەسىندە بىرقاتار ماڭىزدى رەفورمالار جۇزەگە اسىپ جاتقانىن، پارلامەنت پەن ۇلتتىق قۇرىلتاي جۇمىسىنىڭ جاڭا فورماتتا دامىپ كەلە جاتقانىن ايتتى. ونىڭ پىكىرىنشە، بۇرىنعى دەپۋتاتتاردىڭ بارلىعى بىردەي جاڭا قۇرامعا ەنبەۋى، ولاردىڭ شامامەن 15 پايىزى عانا ۇسىنىلعانى جاڭارۋ ۇدەرىسىنىڭ كورىنىسى. سونداي-اق ول ءار پارتيانىڭ ءوز سەزىن اشىق وتكىزىپ، كانديداتتار ءتىزىمىن الدىن الا جاريالاۋى ساياسي اشىقتىق پەن باسەكەلەستىكتىڭ جاڭا كەزەڭگە وتكەنىن اڭعارتاتىنىن جەتكىزدى. كانديداتتار اراسىندا ساياساتقا بۇرىن ارالاسپاعان جاڭا ەسىمدەردىڭ كوپ بولۋى قوعام قىزىعۋشىلىعىن ارتتىرىپ وتىرعانىن، ال شەتەلدەگى قانداستاردىڭ دا سايلاۋ ناتيجەسىنەن وڭ وزگەرىستەر كۇتەتىنىن اتاپ ءوتتى.
ءوز كەزەگىندە قوعام بەلسەندىسى ەربول ماندىبەك بيىلعى ناۋقاندا پوپۋليستىك ۇستانىمداعى تۇلعالارعا قاراعاندا كاسىبي ءارى تاجىريبەلى كانديداتتارعا باسىمدىق بەرىلگەنىن ايتتى. ونىڭ پىكىرىنشە، كەيبىر پارتيالار تانىمال ەسىمدەردى كوپشىلىك نازارىن اۋدارۋ ءۇشىن ۇسىنعانىمەن، سالماقتى ساياسي ينستيتۋتتار بىلىكتى ءارى جاۋاپكەرشىلىگى جوعارى ۇمىتكەرلەردى تاڭداعان. سونداي-اق ول جاريالانعان تىزىمدەردە جاڭا ەسىمدەردىڭ، اسىرەسە جاس ءارى ءبىلىمدى مامانداردىڭ كوپ ەكەنىن اتاپ ءوتىپ، بۇل قۇرىلتاي قۇرامىنىڭ ساپالى جاڭارۋىنا نەگىز بولادى دەگەن پىكىر ءبىلدىردى.
جالپى، قوعام بەلسەندىلەرىنىڭ پىكىرلەرى بيىلعى ساياسي ناۋقاننىڭ باستى ەرەكشەلىگى رەتىندە اشىقتىقتىڭ ارتۋىن، كانديداتتار قۇرامىنىڭ جاڭارۋىن جانە ازاماتتاردىڭ ساياسي ۇدەرىستەرگە قىزىعۋشىلىعىنىڭ كۇشەيگەنىن كورسەتەدى. ساراپشىلار مەن قوعام وكىلدەرى ءۇشىن ەندىگى نەگىزگى ماسەلە – جاريالانعان رەفورمالار مەن كادرلىق جاڭارۋدىڭ ناقتى ناتيجەگە ۇلاسىپ، ونىڭ اسەرىن حالىقتىڭ كۇندەلىكتى ومىرىنەن كورۋ.
