ۋكراينا پرەزيدەنتى ەلگە رەسمي ساپارمەن كەلگەن ازەربايجاننىڭ سىرتقى ىستەر مينيسترىمەن كەزدەستى، دەپ حابارلايدى "ادىرنا" ءتىلشىسى.
كيەۆتىڭ حابارلاۋىنشا، ازەربايجان مەن ۋكراينا اراسىنداعى ستراتەگيالىق سەرىكتەستىكتىڭ قازىرگى جاعدايى مەن دامۋ پەرسپەكتيۆالارى تالقىلاندى. تاراپتار ساياسي ديالوگ، ەنەرگەتيكا، كولىك جانە گۋمانيتارلىق سالالارداعى ىنتىماقتاستىقتى، سونداي-اق ءوزارا قىزىعۋشىلىق تۋدىراتىن وڭىرلىك جانە حالىقارالىق ماسەلەلەردى قاراستىردى.
كەزدەسۋ بارىسىندا ەكى ەل اراسىنداعى دوستىق پەن ءوزارا قۇرمەتكە نەگىزدەلگەن قارىم-قاتىناستاردى ودان ءارى نىعايتۋدىڭ ماڭىزدىلىعى اتاپ ءوتىلدى. كەلەسى جىلى ازەربايجان مەن ۋكراينا ديپلوماتيالىق قاتىناستار ورناتقانىنا 35 جىل تولادى.
سونداي-اق ۆلاديمير زەلەنسكيدىڭ بيىل ءساۋىر ايىندا ازەربايجانعا جاساعان ساپارى جانە ونىڭ بارىسىندا قول جەتكىزىلگەن كەلىسىمدەردىڭ ەكىجاقتى قاتىناستاردى جاڭا دەڭگەيگە كوتەرۋدەگى ماڭىزى ءسوز بولدى.
تاراپتار وڭىرلىك قاۋىپسىزدىك، ۋكرايناداعى جاعداي جانە حالىقارالىق كۇن تارتىبىندەگى وزگە دە وزەكتى ماسەلەلەر بويىنشا پىكىر الماستى.
ازەربايجان ۋكراينا ەگەمەندىگى مەن اۋماقتىق تۇتاستىعىن حالىقارالىق دەڭگەيدە مويىندالعان شەكارالارى اياسىندا قولدايتىنىن تاعى دا راستادى.
