وتباسى بانك ەسكى پانەلدى جانە جەكە ۇيلەرگە يپوتەكا بەرۋ تالاپتارىن جاڭارتتى، دەپ حابارلايدى "ادىرنا".
جاڭا تالاپتارعا سايكەس، ەندى بەتون جانە كەرامزيت-بەتون نەگىزىندەگى پانەلدى ۇيلەردەگى پاتەرلەردى كەپىلگە قويۋعا بولادى. نەسيە الۋعا ءوتىنىم بەرگەن كەزدە مۇنداي ءۇيدىڭ پايدالانۋعا بەرىلگەنىنە 60 جىلدان اسپاۋى كەرەك. بۇعان دەيىن بۇل مەرزىم 50 جىل بولاتىن.
سونىمەن قاتار وتباسى بانك كەپىل رەتىندە قابىلداناتىن جەكە تۇرعىن ۇيلەردىڭ ءتىزىمىن كەڭەيتتى. ەندى قۇرىلىس كومپانياسى سالعان سيپ-پانەلدى جەكە ۇيلەردى دە كەپىلگە قويۋعا بولادى. بىراق نىساننىڭ پايدالانۋعا بەرىلگەنىنە بەس جىلدان اسپاۋى ءتيىس.
مۇنداي ۇيلەرگە قوسىمشا تالاپتار قويىلادى. اتاپ ايتقاندا، سيپ-پانەلدەردىڭ سايكەستىك سەرتيفيكاتى بولۋى قاجەت. ءۇيدىڭ ىرگەتاسى تەمىربەتون پليتالارى، بەتون نەمەسە بۋت تاسى سياقتى سۋعا ءتوزىمدى ماتەريالداردان سالىنۋى كەرەك.
بۇدان بولەك، ءۇيدىڭ ىشكى جانە سىرتقى ارلەۋ جۇمىستارى تولىق اياقتالىپ، بارلىق قاجەتتى ينجەنەرلىك جەلىلەرگە – سۋمەن جابدىقتاۋ، جىلىتۋ، كارىز جانە ەلەكتر جۇيەلەرىنە قوسىلۋعا ءتيىس.
